【全球樓行】港女沙巴搞生意!6000元月租1500呎開精品酒店 每月收入近四萬

更新時間 (HKT): 2019.11.30 00:00

「香港如果要做生意嘅話,我覺得冇過百萬都好難。」85後港女Melody與馬拉老公Andrew在沙巴亞庇,以20萬令吉(約40萬港元)將商廈單位改成設有5間房的精品酒店:「沙巴旅遊業開始發展,所以商務大廈改變成為精品酒店或民宿都係好熱門趨勢。」該單位月租僅3000令吉(約6000港元)。Melody表示:「你揸住一部iPhone就等於揸住一個精品酒店嘅月租。」入場費低,大有發展空間,馬拉本地薑Kenny跟Henry熟悉沙巴規劃,選擇在新發展區商廈大展拳腳,希望飲頭啖湯。香港在目前不明朗的經濟環境下,創業?可能會較多阻滯!如果在香港難以達到的目標,飛往距離香港1824公里的馬來西亞沙巴會容易點嗎?

2004年Andrew來港讀書,認識同樣修讀神學的香港女生Melody,二人2013年結婚,其後決定定居沙巴。看到今日香港的亂局,Melody感慨:「今時今日嘅香港同五年前我離開時嘅香港已經唔一樣。五年前離開時,香港仍然係一個遊客好多、經濟活動好頻繁嘅地方。但係五年後今日,當香港面對好多不明朗因素時。好多朋友打電話問我,移民嚟馬來西亞難唔難。嚟到沙巴,我發現原來生活可以好唔一樣,原來係好小嘅事情都可以好開心。 5年前喺香港見到雨傘運動到今日返送中運動,好多年青人甚至成年人,連發聲都好似有壓力,我覺得喺沙巴嘅生活真係可以好輕鬆。」

創業,對Melody來說本是大纜都扯唔埋的事:「我人生入面冇諗過會從商,但因為呢度嘅最低工資大約係2200港紙,如果我要飛返香港的話,可能就要用我一個月人工。但對於香港人嘅生活指數嚟講,可能我香港工作儲落五年嘅儲蓄就已經可以喺沙巴做到一盤生意。香港如果要做生意嘅話,我覺得冇過百萬都好難,但沙巴有好多商機、好多創業機會。」

Melody跟Andrew在開設精品酒店前,早已一嘗創業夢,Andrew表示每天至少有20班航班直航抵達沙巴亞庇,認為亞庇酒店數量不足應付,而且中港台三地遊客偏好民宿多於酒店,於是兩年前承租一個住宅單位,以兩萬令吉(約4萬港元)成本開始做首間airbnb民宿,現時發展至8間。看到近年沙巴商務大廈改建成精品酒店或者民宿成為熱門趨勢,Melody亦相當有興趣,於是與團隊開設首間精品酒店Oikos:「我哋覺得回報率都幾高,幾值得投資,加上我哋有兩年經營民宿經驗,我哋覺得係可行嘅。」

租下在亞庇最大型商場imago旁,一個約1500呎的商廈單位。重新裝潢並改建成有5間房的精品酒店,房型二人至四人套房不等,Andrew表示:「呢度嘅裝修,大概用20萬令吉(約40萬港元) ,呢度嘅月租係3000令吉即,係6000蚊港紙。」當記者在嘆息,6000港元在香港只能租到128呎的龍床盤時,Melody笑言:「係好經濟,你揸住一部iPhone就等於揸住一間精品酒店嘅月租。」記者試住房價320元一晚的二人套房,一般酒店提供的用品如沐浴露、牙膏牙刷、咖啡茶包等均配備。惟隔音較差,清楚聽到其他房客出入和門外交談聲音。但三百多元一晚的房間,CP值算高。

雖然6月酒店開業時,只得五間房間,但Melody指生意相當不錯:「由我哋開始到而家,係冇蝕過。一開始6月尾到9月,基本上每月會有超過20日嘅入住率,有啲房間甚至31日都會有住客入住。」她透露,酒店每月入住率一般有八至九成,粗略估計,六月至九月期間,五間房間為Melody帶來每月近3.9萬港元收入。

為增加房間供應,Andrew表示,已於樓上租多一個同樣約1500呎的單位,開設多間精品酒店Oikos2.0:「暫時目前一層可以做到5間房,加埋樓上總共有11間。」兩層精品酒店成本合共約40萬令吉(約80萬港元)Melody保守估計兩年可回本:「我哋睇到精品酒店可能會比民宿有更高回報率,喺未來嘅日子,希望呢一整棟商廈或呢一區用精品酒店嘅經營方式,我覺得係可行亦都係幾可觀。」

這盤生意看似大有發展空間,但經營精品酒店須持有酒店牌,加上酒店單位前身是辦公室,改建須符合消防條例及各項條件,看似複雜費時。Melody則認為較他們像中容易:「半年內已經可以搞掂晒,包括消防批核、酒店牌照同埋裝修。大約幾千令吉(約3000至10000令吉不等),就可以有個本地中介人,幫助外國人去申請公司,喺度做業務牌照。」

馬來西亞間中傳出有貪污和排華的報道,這個國家是否真是一個創業的好地方?當地律師事務所,Alan Tan & Lee律師事務所合夥人李萬寧建議,千萬不要去相信別人聲稱的快捷的方法去申請牌照:「這是很多外國人來到一個人生路不熟的地方,很多都會跟住去做,我們都會建議大家要找一些專業的人士去先了解申請過程。」作為外地人的Melody亦坦言擔心過:「我初頭會聽到好多呢度貪污嘅情況,警察可能會收枱底錢,但我冇經歷過任何本地人問我要錢嚟解決問題。其實馬來西亞係一個多元種族國家,可能佢哋會有宗教或者種族主義 ,但我覺得成個環境同人嘅文化都係好包容同接納,我未感覺到被排擠。」

香港還在一片催淚煙中,只見年輕人流血抗爭,看不到前景。Melody在馬來西亞學校是半職的性教育、生命教育課程導師,接觸過香港、馬來西亞兩地青少年,她非常感觸:「香港年青人的確係比較Smart,細細個已經接觸到世界所有嘅資訊、新聞、科技。但係馬來西亞年青人對於國際時事或金融觸覺,冇咁感興趣或者比較少接觸,呢度嘅年青人係好單純同埋好開心,佢哋嘅笑容同笑聲係從心而發。」為了下一代,走?不走?香港人還在忐忑。

記者:張嘉鎣 沙巴直擊

關心你飯碗,貼近你生活,即Like「蘋果ATM」FB專頁!
BannerBanner