【智取大市】殭屍股都有復活的一天?(晉佳)

更新時間 (HKT): 2020.01.14 21:00

港股成交突破千億,恒指跟隨人民幣轉跌,跌勢唔算急,走勢已算不差。持有強勢股嘅話,另一個威脅係接連出現嘅配股抽水潮,日日總有兩隻,最新又有錦欣生殖股東減持舊股套現,可謂避無可避。呢個情況亦反映增長股估值被拉高到遠高於市盈增長率1倍,對股東嚟講固然係套現良機。

資金離不開輪流炒作,近排新經濟股威盡,高位回吐一日幅度不大,似健康調整,未玩完。個幾星期前水泥股曾經係最強勢周期股,但近日港股升勢強,水泥股逆市回吐落嚟,又唔覺得特別超買。

中建材(3323)同海螺(914)都一度爆上,但前者近期較強,原因係中建材尋求到將其超高負債煞掣嘅方法,睇返過去9個月,淨負債由舊年初嘅1,921億人民幣降至舊年9月底嘅1,880億人仔,有形淨資產負債比率由9倍樓上急降至6倍左右,超高槓桿之下,有形淨資產喺9個月間急增五成!

市場期待中建材能夠趁行業好景繼續減債兼提升淨資產水平,一來可降低風險,二來減債等如減利息開支,有利他日盈利表現,於是股價明顯轉強。中建材告別喪屍行列要天時地利人和配合,不過現況已足夠掀起重估潮,最緊要股價反應證明市場相信呢個故事,投機性買入係唔錯選擇,不過負債超高,真係好投機。

晉佳

https://www.facebook.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner