【李華華Online】耀才TVB落賀年廣告 舊年底明明話割席

更新時間 (HKT): 2020.01.15 19:41

自反送中運動開始,TVB成為頭號狙擊對象之一,有網民更加發起抵制廣告商運動,一落廣告即刻喺Facebook負評。公司聞之色變,部份更加喺Facebook公開割席,贏得大量網民好評。不過有口痕友同華華講,有間公司割完席,轉頭又縫番好張席。

講緊嘅係耀才(1428)。話說佢舊年11月喺Facebook出post,寫到明「本公司與TVB的廣告合約已經完結,沒有計劃在TVB繼續落廣告」。個post仲有過萬「like」,有散戶仲揚言「永不轉戶」、「呢個post肯定比TVB嘅廣告有效。」

正當大家以為耀才廣告唔會再喺TVB出現時,轉個頭呢間證券行竟然落咗套賀年廣告,耀才主席葉茂林同寶貝女葉頴恩(Jacquelyn)聯同一眾高層一齊同大家拜早年。

11月話冇計劃喺TVB落廣告,轉個頭湯家驊式轉身,耀才行政總裁許繹彬(Edmond)就解釋話生意難做,呢排新股市場好番啲,想谷宣傳咁話。佢仲話喺唔同渠道都有落廣告,唔止係TVB,「大家都要搵兩餐」。Edmond強調落廣告無受到壓力,「只係想造大個餅」。至於如果網民一面倒負評,會唔會抽起廣告?Edmond就話要睇情況。

抵制活動講到明,如果今年起再見到廣告商喺TVB出現,會立即列入「永久抵制名單」,耀才可能要諗計仔點樣拆解呢場危機。

李華華

關心你飯碗,貼近你生活,即Like「蘋果ATM」FB專頁!
BannerBanner