【李華華Online】野生捕獲鄭志剛派口罩

更新時間 (HKT): 2020.02.14 16:17

大孖沙捐錢抗疫已經唔係新聞,敢落去市面同前線打氣先係真漢子。華華收到讀者報料,話前幾日喺尖沙咀K11 MUSEA撞到疑似新世界(017)揸弗人鄭志剛(Adrian)戴住口罩派嘢,唔係派利是,唔係派傳單,而係派口罩。

由於戴咗口罩嘅關係,而且唔同時平有班人跟出跟入,比較難睇到係咪Adrian本人。華華搵新世界求證,原來Adrian係向前線同事派裝有口罩、消毒噴霧同濕紙巾嘅「抗炎包」,想同客戶服務員、清潔工同保安員打打氣咁話喎。連身家千億以上嘅Adrian都落手落腳去抗疫,似乎係將大孖沙抗疫條bar推上去新嘅層次。

前線員工要繼續做嘢,後勤員工Work From Home又完未呢?新世界話員工的彈性上班安排會延至3月1日,如果員工做完嘢,會鼓勵佢哋去做義工,幫NGO手搜羅抗疫物資同包裝「抗炎包」咁話,另外義工團隊已經送上逾千支消毒搓手液,等視障人士可以安心出街。

新世界業績會就快到,唔知Adrian會唔會戴口罩公布業績呢?

李華華

關心你飯碗,貼近你生活,即Like「蘋果ATM」FB專頁!
BannerBanner