【笑到最後】下一個政策風險:限租令(高明)

更新時間 (HKT): 2020.04.05 12:27

滙豐控股(005)史無前例咁唔派息,背後原因唔係冇錢,而係英倫銀行要求銀行暫停派息留錢備用。武漢肺炎令全球政府可以用緊急嘅名義,嚟擴大對企業的控制,外國嘅政策,已經直接影響咗香港小股民嘅利益,未來政策風險,首推「限租令」,即係租金管制。

特首林鄭月娥喺社交網站度話:「面對冷清的商場、人流稀少的店舖、租戶的欲哭無淚和員工的徬徨焦慮,難道業主只因手握一紙租約而無動於衷嗎?」連有法律效力嘅合約都被貶為「一紙租約」。

回顧近期抗疫政策推出前後,首先都係放風,例如先認定歐美疫情更嚴重,之後就禁止非香港居民入境;覺得人多會有風險,就禁止4人以上聚集;有患者懷疑喺蘭桂坊染病,然後林鄭就先講限酒令,後下令餐廳人數減半,再將酒吧卡拉OK等停業。

以此推論,依家放風針對租金,下一輪好快到政府逼業主減租甚至免租。千祈唔好高估現屆政府嘅思維,覺得「唔會嘅、冇法律基礎」。政府行動模式就係聽到邊樣做邊樣。至於法律基礎,同過去大半年一樣,可以生效後再搵。

疫情令人減少出街及保持社交距離,其實已非租金問題,係冇生意嘅問題。下令餐廳座位減半同大部份行業停業,係佢決定嘅,要業主埋單嘅話,隻鑊都卸得幾快。一早封關及鼓勵戴口罩,疫情可能會更加受控,類似留學生回流前嘅香港,至少有本地生意做吓。

對地產股嘅影響,首當其衝,一定係房託REITs,依賴租金收入去派息,如果政府推出限租令,有效期肯定唔會係14日,至少都會係3個月,最長可能係逼令業主疫情過渡前都要跟政府要求減租,即18個月嘅疫苗生產期,即時影響領展(823)、置富(778)等房託嘅租金收入,影響力比滙控唔派息更大,因為減息派之餘,收入真係少咗。

之前講過,每次金融危機見底,必定喺退休人士份退休金嘔返出嚟。房託係好多人將退休金儲存嘅地方,估唔到,最大風險唔係生意危機,而係人為嘅政策危機。

關心你飯碗,貼近你生活,即Like「蘋果ATM」FB專頁!
BannerBanner