【獨家】踢爆滙豐維權組織真面目 劏房「業主會」教人借私貸炒燶滙豐

更新時間 (HKT): 2020.04.07 00:00

【新增回應】滙豐控股(005)停派息惹起小股東不滿,以香港中小型業主會(下稱:業主會)創辦人呂宇健(Ken Sir)為首突然組成滙豐小股權權益大聯盟,掀起一場維權運動。不過有業主會中人向《蘋果》踢爆,原來這個會過去多年教一班學員以所謂「loop loop loop大法」方式借私貸及銀行透支額度(Overdraft Line)投資高息滙豐,惟滙控煞停派息令到這個「loop」中斷,惹起學員不滿,遂施壓Ken Sir掀起運動。

近年不斷開班教授投資物業的香港中小型業主會招攬會員眾多,除教人將物業變成劏房及投資車位,更教人用複雜財技買滙豐自製所謂被動收入。

曾報讀Ken Sir「時間自由班」的學員阿文(化名)踢爆,投資班基本上只教兩招投資大法,一是借錢買滙豐,二是炒劏房,「佢只會鼓吹人買一隻股票,就係滙豐,因為得佢派息能夠玩到loop loop loop大法。依家滙豐唔派息,一班學員損失慘重。」

借私貸以3倍孖展掃滙豐收息

所謂「loop loop loop大法」,簡而言之是透過借貸不斷買入滙豐,只要維持6厘以上股息率、較貸款利率為高,就能食盡息差,「假設借50萬私貸,分5年還,每月大概還9,000元,再將50萬做孖展槓桿到3倍買滙豐150萬元貨。滙豐維持6厘息嘅話,每年就有10.5萬股息還私人貸款,股價5年之後冇升冇跌,還完私人貸款仲有50萬市值嘅滙豐股票。」

根據本報獲得Ken Sir的上堂照片顯示,其「高階版」槓桿心法投資風險極高。先撇除滙豐股價變動,若要成功實踐,前設是滙豐5年內維持6厘派息率,而且要取得低息私貸。阿文指,這亦說明Ken Sir為何會教學生先「做靚」自己信貸報告,用以獲得大額私貸。

據業主會網頁的「學員見證」顯示,的確有不少學員提及類似的槓桿投資財技,包括一名第18班學員Ronald指:「短短呢四個月,邊學邊做。我一口氣cut晒十幾張信用卡,還晒啲私人貸款,信貸評級由C跳到上A ,準備一筆大啲嘅私人貸款去買一些投資產品製造息差 。」說法與阿文提及的借錢買滙豐手法脗合。

「根本係一個宗教,啲同學好白癡」

滙豐煞停派息,隨即令環環雙扣的loop中斷,大批學員頓時蝕到入肉。「根本業主會係一個宗教,啲同學好白癡,Ken Sir講咩真係照跟。好多人係滙豐60蚊時借錢買,依家滙豐大跌唔派息,條數點還?所以一輸就好甘。」

阿文續指,自己上過一段時間投資班後,發覺所授方法「踩鋼線、走法律罅」,風險極高,故自己未有跟隨,但其實前後已花近10萬元學費報讀。「睇返係一場層壓式騙局,好多投資方法係唔道德,當然投資係有風險要承擔,但你唔係咁樣教人借私貸倍大佢。」

阿文又說,Ken Sir上堂從來不會派筆記,資料只會於堂上播放。投資班每班有幾十名學員,官網更聲稱已有2萬名學員,但以他過往所見,不少人只是「無錢嘅廿幾歲後生仔」,對於Ken Sir借錢投資的心法深信不疑。「半年前滙豐50蚊左右,Ken Sir話個會已經有2至3億元市值滙豐,你就可以想像到有幾多人跟買。」

滙豐大跌後,Ken Sir於業主會群組聲稱已於40元盡沽,現只留一手滙豐。「咁個Group梗係有人不滿,但我會話佢做得好好,為咗逃避學員追討投資建議責任,識得帶頭企出嚟聲討,將責任轉移返畀滙豐,又變返同一陣線。」

由Ken Sir為首的滙豐小股東權益大聯盟,昨日聯同兩位小股東召開記者會,批評滙豐未有履行承諾派息。本報記者在記者會上問到開班教借貸炒滙豐事宜,Ken Sir回應指,「我哋未清楚呢個係咩訊息,所以我哋暫時不能披露。」今日早上Ken Sir再以公開信回覆《蘋果》,未有正面回應「loop loop loop大法」是否令到眾多學員炒燶滙豐而掀起抗爭,僅指出集中某一「業務」是模糊了記者會焦點,又指「從來沒有百分百穩贏的投資工具,駕馭到風險才能取得相應回報」。

維權記者會疑搵自己人做「媒」

事實上,昨日出席滙豐小股東權益大聯盟記者會的代表,原來幾近全為業主會骨幹成員。阿文指,除卻無法辨認「包到冚」的所謂小股東黃女士之外,其他人包括是Ken Sir基金公司及教炒期權的拍檔等,甚至連在台上梨花帶雨、自稱是滙豐苦主的「李女士」,亦在業主會負責「舊樓重建」部份。

未有申報其利益關係的「李女士」記招後接受本報訪問時,亦企圖裝成獨立股東,「我喺Facebook見到佢哋呢啲群組(滙豐小股東權益大聯盟群組),即刻就入去」。她又指,滙豐不派發2019年末期息的做法,等同逼小股東,「可唔可以話係逼我哋去跳樓呀?可唔可以話係逼我哋呢啲退休人士,拎埋老本陪你哋玩呀?而家根本上係一浸一浸咁搣我哋,一浸一浸咁打劫我哋」,她激動地指對退休生活失去預算,又無力與滙豐周旋。

不過,本報在業主會Facebook上載的影片發現,一位相貌與「李女士」有9成9相似、名為Karen To的女士,曾拍片多謝Ken Sir為她帶來啟發,片中指「Ken Sir比(畀)我諗到另外一種退休之後嘅生活,喺(係)可以操控係(喺)自己手中」,估計是業主會學員之一。而該影片亦於記者會完結當日傍晚被刪除。本報就事件向記者會公關查詢,未獲回覆。

Ken Sir在記者會後,亦兩度撇清滙豐小股東權益大聯盟與業主會的關係,「我旗下所有公司,包括寶庭重建及中小型業主會喺呢件事上面係冇任何身份」,又指自己唯一身份是滙豐股東,稱就今次事件,「我個人少收嘅金額超過300萬元」,但無披露最新持股。

官地市場「冒起新星」 寶庭屯門地1萬呎劏15幢排屋

由Ken Sir創辦的業主會,近年不斷開班教授投資物業,包括將物業變成劏房及投資車位,招攬會員眾多,近年更成為官地市場「冒起新星」。

與該業主會有關聯的寶庭重建,兩年前踏足官地,以8,319萬元投得屯門藍地福亨村地皮,索性自己起「劏房」,將僅1萬方呎樓面,向城規會申請建15幢排屋,每伙不足700方呎兼設車庫,該會曾指屯門地皮建成後,或以成本價賣予有關聯的香港中小型業主會會員。

2018年10月,當時政府推出山頂文輝道地王招標,因出價未達政府底價而「難產」收場,流標後同月,樓市觀望氣氛濃厚,政府推出屯門藍地福亨村地皮出售,只收三份標書,反應極為冷淡,寶庭集團則為入標財團之一,在淡市下高於市場上限達17%,以8,319萬元投得地皮,每方呎樓面地價8,188元,取態非常進取。

寶庭集團「食髓知味」,隨後多次在官地投標出手,屬傳統大孖沙投地之外,近年冒起的競爭對手。寶庭曾入標地如油塘高超道地皮及啟德地皮,入標代表袁銘琛於入標啟德地時更直言是「乘勝追擊」。並稱是夥拍本地基金合資投標啟德地皮,又指往後會以這個模式投地。

翻查公司註冊處資料,寶庭集團控股有限公司董事包括袁裕深、呂宇健、何璟芸、陳敏儀、溫業鋒。去年9月,寶庭集團易名元亨創業集團有限公司。

記者:陳洛嘉 黃珮琳 湯家明

關心你飯碗,貼近你生活,即Like「蘋果ATM」FB專頁!
BannerBanner