› 選擇地區
三藩市
紐約
洛杉磯
其他美國地區
香港 台灣 北美
 
2002年08月17日

股壇瀏覽器:大行改口睇淡樓市

繼新地(016)珀麗灣以居屋價開售後,長實(001)更提供優惠,吸引屋居業主回售居屋轉買泓景臺,而恒地(012)索性為元朗蝶翠峰二期提供首年月供500元優惠。唔知係咪想連公屋住戶都想撬走?呢次港府真頭痕。
咁嘅勢頭,發展商好似唔單止要迫港府放棄建居屋,直頭係想迫港府停建公屋。若果政府唔及時回應,相信略有改善嘅負資產情況,將再度惡化。本港經濟持續收縮,寄望收縮幅度唔會好似董建華家族嘅東方海外(316)盈利咁,大縮98%。
現時睇淡地產股嘅證券行唔算多,高盛一直都睇淡,最近里昂至改口風睇樓價會下跌,但經過最近嘅開盤情況,相信好多分析員都要低頭認錯,紛紛調低地產股盈利預測及評級。以2000元開售蝶翠峰嘅恒基,股價已有少少腳軟,此盤每呎成本價3000元,即係該項投資蝕超過3成。

易達興業又傳賣殼
易達興業(855)噚日又傳出賣殼好事近,成交略為增加至330萬元,但好似有人想趁炒高出貨。易達興業經常都傳賣殼,可惜傳咁耐都未成事,等到阿虎都有啲沮喪。
海爾集團向海爾中建(1169)出售青島合營公司,換取海爾中建新股,持股量由21.93%增至43.28%,重未可以做大股東,相信證監會仍未開綠燈豁免海爾集團毋須全購。不過由於新股每股作價0.20元,遠較停牌前報價0.102元有溢價近倍,相信幕後人士會做嘢安慰吓海爾集團,0.20元是海爾中建下一個目標價,最終當然不止此數啦。此股噚日收0.156元,升53%,成交1260萬元,暫時睇見個棚都算穩陣。
阿 虎

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載