› 選擇地區
三藩市
紐約
洛杉磯
其他美國地區
香港 台灣 北美
 
2002年08月19日

地產多聲道:趙國雄賣樓如同革命

長實趙國雄:「毛主席話,革命不是吃茶看花。壞事可變好事。」

長實趙國雄對「毛語錄」的熟悉程度,昨日又再令蘭西折服。話說大家在泓景臺售樓處與趙國雄言談甚歡,有行家問佢今日有何教誨?他氣定神閒地說,毛主席講過「革命不是吃茶看花」,放在今日,可以引申為「賣樓不是吃茶看花」。現時市況之下,賣樓要寸土必爭,手法要有變化,務求突破,所以佢地今個禮拜公布的泓景臺「驚天大優惠」,一定可以吸引買家視線。
重有一句,「壞事可變好事」,趙生話,同行一齊推盤,亦不一定是壞事,睇吓成個市,連埋居屋認購,有接近二萬個票源,市民係攞真金白銀入票,唔係所謂電話訪問的口頭意見調查可比,對港冇信心又點會入票買樓?他們才是真正肯「留港建港」的一群。大家一齊推盤,反而試出市民的買樓意欲,就即係所謂壞事變好事也。

只要租客好業主乜都制
業主租層樓出去都想有個好租客,外籍租客就最受歡迎,即使有額外要求亦不會計較。
蘭西聽觀塘麗港城嘅地產經紀講,部份日本租客,會指定要附連全屋日本牌子電器,更表示可以每月多付一千元或以上,一再證明日本人愛國心幾咁重。
其實,現在個市咁淡,租盤成交比例都少咗,租金又話有下跌壓力,遇上有好租客,重話肯畀多啲租金,好多業主都會立即應承,換晒日本家電去迎合。即使要求有齊電器,只要係公司租客或背景好嘅,都肯去添置,最多去豐X買,貪佢夠平。

參觀樓盤細路最開心
近期焦點珀麗灣,過去兩日成為最多人參觀的一個新盤,噚日打風,現場空曠地方橫風橫雨,發展商搞嘉年華會表演都冇咩人有心機睇。前日風和日麗,現場氣氛就好好多,不少隨父母到場嘅小朋友,欣賞外籍樂手表演後,對佢地啲樂器好有興趣,嚷着要打鼓,班老外音樂人亦好似遇到知音咁,不斷用簡單英語讚佢哋打得好,𠱁到班細路同父母鬼咁開心。

新地為千幾新貨真情告白
焦點樓盤馬灣珀麗灣及長沙灣泓臺二期最近內購,本報都收到買家投訴,話安排失當,售樓處好擠迫混亂。本報向發展商查詢,兩家均有回應,其中新地唔單止書面回覆本報,重刊登廣告,公諸天下,對各方不滿,逐點解釋。
新地又表示萬二分抱歉,承諾日後會妥善安排,盡量避免令買家不便。前兩日蘭西到珀麗灣了解,秩序又真係改善咗不少,算係有個交代啦!
新地跟住又話,珀麗灣重有千幾個單位稍後推出,有興趣嘅買家,可以入票認購,詳情快將公布,叫買家密切留意。
新地公開回應投訴,顯示重視公司形象,況且重有千幾單位未賣,無謂得失客仔。將回應投訴變成「真情告白」,攞晒印象分。之後順手做埋宣傳,話遲啲發售,一舉兩得,諗出呢個廣告嘅真係公關高手。大家學嘢啦。

太古城買賣長途電話搞掂
二手供應多,買家成主導,可以慢慢揀到滿意至買,作為代理,要做好多工夫至可促成交易。
美聯太古城天山閣分行營業經理許昭儀同蘭西講,最近遇到個客,指明要搵太古城八百呎嘅三房單位,重要向東南,要靜,條件多多。
佢搵晒公司啲盤口,只有明宮閣高層D室啱條件,且只得租盤。許昭儀最後發現有個業主已經移民加拿大,肯轉租為售嘅機會較大,所以在深夜時分(因為時差)致電對方,經一個月游說與議價,終於搞掂,成交價255萬元。
聽講買家係回流客,兩三個月前開始喺太古城搵樓。窮則變,變則通,係搵食嘅不二法門。

大陸樓多命名傷腦筋
內地咁大,樓盤眾多,個個為求突出,絞盡腦汁,起咗好多令人意想不到嘅名稱,如金色維也納、聯洋新天地、銀座金鑽,單看字面很難令人聯想到係物業。
有啲個名好似冇乜特別,如香梅花園,原來係陳香梅題字同命名。搵到名人題名,梗係要標榜啦!不過,好多香港人未必知道陳香梅是誰,但老一輩及對近代史有認識嘅人都會識,佢係抗日名將陳納德嘅夫人。
另外,有啲名聽落好有氣勢,如大唐盛世花園,充滿懷舊味道,但又唔係好霸道。
蘭西
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載