› 選擇地區
三藩市
紐約
洛杉磯
其他美國地區
香港 台灣 北美
 
2002年10月10日

地產多聲道:陳法蓉呂少玲參觀摘星閣

摘星閣

司徒拔道「迷你豪宅」摘星閣,果然盤如其名,係聚「星」之地。近排發展商趁物業屆現樓,再度促銷。聽講上周就有兩個靚女明星先後駕到去睇樓。其中一位係陳法蓉,同爸爸一齊去睇樓,聞說佢爸爸鍾情地下連花園單位,可能鍾意有地方可一享種植之樂啩。呢個地下連花園單位,貨量唔多,重有六個,793呎,但就有四百幾呎私家花園。
另外,有打女之稱的呂少玲,上個禮拜黃昏同媽咪去睇樓,好似鍾意頂層連天台單位多啲,貪有私人空間啩。個區假假地都算豪宅區,對面係跑馬地,隔籬東山台,隱藏唔少星級人馬,加上環境夠寧靜,可免「狗仔隊」騷擾,自然受明星鍾愛。

張炳強周國賢集體懷舊
愈嚟愈似大細路咁好玩貪食嘅恒基張炳強,噚日為慶祝中原黃埔新舖開張,專登喺附近嘅蔡瀾美食坊買咗一大盤嘅麥芽糖夾心餅請大家食。
佢話已經幾十年冇食過,實在太緬懷,同埋嗒落實在太好味啦!可能新地周國賢同佢屬同一年代,大家有同樣的記憶與情懷啩,周sir一嚟到,就即刻嗌住要食,重食唔停口,連𡁻兩件先至為中原個舖做開張剪綵同開香檳,簡直同張生好似對活寶貝。

港置三公升紅酒獎勵員工
九龍倉嘅深井碧堤半島賣咗一段時間,成績算唔錯,又到咗代理慶祝嘅時候。香港置業喺十月份主管會上,特別頒銷售策略大獎畀有份參與碧堤嘅主管,送咗支三公升紅酒畀發展項目部區域副總經理黃德華,等佢同下屬分享。
而九龍豪宅區經理馮智賢同發展商項目部副區經理梁偉明,都攞到支細嘅。港置董事胡日發話,公司喺碧堤嘅碧海連天、內購同公開發售都做到首宗成交,梗係要慶祝下。支紅酒原產地係意大利,配合番碧堤嘅意大利風情。
另外,入行已十六年嘅丘岳鋒,一年前加入港置,今年3月升為康怡分行經理,𠵱家再升做港島東區經理。佢嘅代表作係同前線同事,喺八日造成七宗聖佐治大廈成交。

裕景興業天后搞商場
裕景興業持有天后地鐵站對面嘅英皇道十四號一樓,約萬二呎商場,改名為「天后蘋果商場」。據代理華匯物業陳國雄講,共間咗十九個舖,以賣潮流嘢為主,大部份約一百到一百五十呎,月租都係三千到六千幾蚊,包雜費同推廣費。個舖之前由東東雲吞麵使用,都係裕景旗下嘅生意。

楊受成入標中環舖皇
中環花旗銀行舖皇上月尾截標,共收約10份標書,標價由一億五千萬至二億元,仲量聯行、第一太平及喜來登旺舖代理均有代客入標。
熱心人士向蘭西報料,多名富豪對舖皇均感興趣,其中資深地產投資者楊受成更以私人名義入標,提出嘅條件重好接近業主要求。
根據標書,最遲會在本月15日公布,現階段正等待美國總公司批核。個舖花旗銀行喺83年,以九千萬元向會德豐購入,今次將會售後租回,月租一百二十五萬元,若以二億元成交,租金回報率有七點五厘,有咁夠實力嘅租客,回報又唔低,難怪富豪們都動心。

杜可風為陶源展芳華
發展商𠵱家賣樓都好着重包裝,除咗花唔少精神拍廣告外,重學咗內地樓盤,請唔同類型嘅專家或藝術家幫手推介。其中永泰亞洲就請攝影大師杜可風,為九龍塘陶源拍咗輯連環圖,以展現「大戶芳華」主題。

長實又做攝石人
發展商之中,論反應快,長實都算數一數二。每次行家有賣樓新動作,長實例必唔輸蝕,出招截擊,好似攝石人咁,增加曝光率。
今次新地準備推將軍澳中心,長實就話準備明後天,派出數十名置業精英於將軍澳地鐵站附近撈客,推介泓景臺同埋傲雲峰。而長實重列舉將軍澳未來有逾三萬五伙私樓供應,實行令買家睇到心寒,轉投他區為止。

戴德梁行台灣搞拍賣
香港幾乎日日都有拍賣會,原來台灣都不時有此舉,今個禮拜六又有一場,重係由香港人熟悉嘅戴德梁行負責,共推出41項物業,分布喺台北縣同桃園縣。
台灣拍賣物業同香港好唔同,唔單止有底價,重有市價畀你參考。另外,去參加拍賣,唔係行入去就得㗎,要帶埋身份證明文件,印章同新台幣六萬蚊本票,咁就一定唔會出現香港黃月鶯事件啦。
蘭西
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載