› 選擇地區
三藩市
紐約
洛杉磯
其他美國地區
香港 台灣 北美
 
2002年11月29日

地產多聲道:
占士邦同邦女郎介紹漾日居

呢盞水晶燈,由十萬粒水晶,用人手穿成,認真矜貴。

英國王牌特務占士邦嚟咗香港,唔通香港有大件事發生?佢重喺尖沙嘴漾日居出現。
其實係永泰亞洲李簡鳳玲安排嘅。李太噚日帶記者參觀占士邦間屋,主人家占士邦由邦女郎陪伴,介紹自己間屋。套房部份牆身與地板,用牛皮鋪砌,摸落有啲拮手,襯晒佢嘅粗豪形象。下層客廳,牆身鋪絲絨,雍容華貴,表示佢有財富,衣帽間地板鋪人造皮。飯廳嗰盞水晶燈重誇張,成十萬粒水晶粒,用人手穿成,極盡奢華。
占士邦帶記者睇完個單位後,揹住背囊走咗。李太走出嚟解畫,呢間屋其實係漾日居個複式示範單位,用咗300幾萬裝修,貴在啲奇特嘅用料。

經紀射客促成擎天4宗買賣
九龍倉尖沙嘴擎天半島二期,勢頭唔錯,不斷有成交。經紀除咗喺街撈到買家之外,透過代理分行「射客」嘅情況都唔少。利嘉閣麗城區分區經理陳潤琪話,加盟該行一年嘅高級客戶經理葉麗蘭(Iris),就係咁樣做成咗4宗成交,總值2700幾萬,Iris淨袋六位數。
聽講呢幾個客,有3個係麗城花園業主,另一個係屬於業主轉介嘅客。之前Iris都係用咁嘅方式促成4個珀麗灣同2個碧堤半島成交。

屯門師奶40萬投資車位
屯門區3個家庭主婦最近買樓又買車位投資。幫佢哋入貨嘅美聯物業置樂分行經理何啟邦透露,呢3個師奶係第一次入市。月頭見到美聯窗櫥啲銀主盤標價幾平,入去問吓,最後夾份,以39萬買咗凱德花園3座中層D銀主單位,計劃放租,月租3700至3800蚊,回報11厘以上。
最近3人又用40萬買咗5個區內車位,恒豐園同恒順園各2個,另1個係置樂花園。何啟邦話,車位有上蓋或者近出入口位置,應該唔憂租,月租估計800到900蚊,回報率逾12厘。

代理行送禮拉客入票
上環帝后華庭、東涌藍天海岸宣傳攻勢浪接浪,引發代理送贈禮品潮,紛紛表明首名透過佢哋公司購入單位嘅買家有着數,利誘買家趁早入票。
美聯物業將送贈帝后華庭頭籌買家家具裝修套餐,最高總值12.8萬元。負責送出優惠嘅iDesign室內設計公司,提供簡約主義、摩登時代及懷舊風情,三款配搭畀買家揀。
香港置業就話,藍天海岸內購同公開發售中,首名經佢哋購入單位嘅買家,可獲得一隻海豚水晶。
蘭西
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載