› 選擇地區
三藩市
紐約
洛杉磯
其他美國地區
香港 台灣 北美
 
2003年01月19日

股市身歷聲:大戶睇好燃氣股

上個禮拜對好多行家嚟講,絕對係個沉重嘅日子,首先就係原本氣勢如虹嘅港股喺升到9800點之後開始掉頭;另一事件就係沿用咗20年嘅最低佣金制終於都被廢除咗,好多行家都好氣憤話政府要趕絕佢哋,實行要告番政府轉頭。不過伏勝覺得,𠵱家點嘈都無用,倒不如喺個市度搵多幾隻好股票,靠自己好過靠政府成立嗰個乜鬼專責小組,唔係都唔知點養老婆仔女。
上個禮拜個市仍然喺度勁炒中資股,聽聞上次炒起咗民企股嗰班大戶轉咗睇好國內燃氣股,尤其係上周連續回吐3個交易日嘅華燊燃氣(8035),佢哋睇好華燊喺天津個新發展項目,聽講重有另一個項目傾緊,所以班大戶話要大力支持吓佢。

僑威傳有基金垂青
另外,有行家話佢哋好快就會有新一批基金大戶加入戰團,要炒起隻股話咁易。睇番隻股喺上星期五個勢的確似有買盤入市,大市跌咗百幾點都當佢無到,照炒可也,聽班大戶講,班芬佬嘅入股價大概會喺個二左右,如果要畀一成折讓佢哋,個目標價即係大概喺個三左右,不過各位入唔入市重係要睇自己嘅勇氣。
另一隻喺國內生產包裝嘅僑威集團(1201)近期都好似生猛番晒咁,雖然個價喺上個禮拜由最高2.8元跌番落嚟,不過有行家就叫伏勝留意留意,皆因隻股喺國內生產嘅包裝盒好受廠家歡迎。國內有好多假冒商品,啲廠商都要以高質素嘅包裝嚟提防假冒,聽講佢哋近排會同雲南某大煙廠傾單大買賣,如果傾得成,就唔慌無生意做。據班行家話,僑威之前發行嘅2004年輪已經俾幾個基金圍咗9成有多,如果有閒錢不妨買番啲嚟坐過年。
伏勝

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載