› 選擇地區
三藩市
紐約
洛杉磯
其他美國地區
香港 台灣 北美
 
2003年05月08日

地產多聲道:刺激人流奏效新地商場添食

新城市廣場三期於五一假期人流大增六成,新地為其他商場搞推廣活動。

新地用二千萬刺激商場人流大計,令旗下商場遊人回升,五一勞動節人流比舊年同期平均有兩位數字升幅,好似沙田新城市廣場三期,主要租戶有西田百貨同玩具反斗城等,人流比舊年多六成,尖沙嘴力寶太陽廣場就多四成,其他增加近兩成嘅商場,包括新城市廣場一期、旺角新世紀廣場同上水廣場。
今個禮拜六日,新地喺旗下三個商場,包括大埔超級城、元朗廣場同置富南區廣場,會搞親親荷蘭「舞」子show活動,內容有「荷蘭街頭藝墟」同「荷蘭民族土風舞」表演。
「荷蘭街頭藝墟」安排小朋友親手摺荷蘭帽同花,等佢哋送畀媽咪表達心意,呢個活動元朗廣場率先喺禮拜六舉行,其他兩個場就係禮拜日。至於想睇「荷蘭民族土風舞」,就要禮拜六去元朗廣場,或者禮拜日去大埔超級城先有得睇。
另外,恒基今日喺將軍澳新都城中心商場舉行Shine簽名演唱會,禮拜日就有鄭中基簽名演唱會同「燃點親情顯愛心」活動。而喺旗下商場貼有特定標誌嘅商舖消費,重有折扣優惠。

祥益行媽咪政策
祥益地產喺屯門區已經有十五年,稱得上係地膽,佢哋好注重同街坊嘅交情,所以趁母親節向區內媽咪表示感謝。
公司總裁汪敦敬話會派康乃馨畀區內嘅媽咪,原本諗住派五千支,最後決定加碼至六千支,每支要五蚊。
佢又話,希望喺呢個咁困難嘅時勢下,可以為每個家庭送上絲絲暖意,以表達共度危難嘅心意。祥益地產咁積極去維持同街坊嘅關係,能夠成為屯門區地膽代理行唔係浪得虛名。

獲贈榴槤山竹周國賢眉開眼笑
大型發展商一向少做獨家代理,但今時唔同往日,佢哋陸續將樓盤委託代理獨家發售。好似新地咁,舊年首次將九龍城獅子石道一號交畀中原地產全權銷售後,紅磡嘅雅景軒,舊年底亦畀中原做獨家,結果賣清光。為慶祝理想銷情,噚日中原邀請新地賣樓部話事人周國賢,去分享呢個美滿成果。
中原饒富心思,準備成枱水果去慶祝,當中梗係唔少得「果王」榴槤同「果后」山竹。中原一姐劉瑛琳同新地周生揸住啲水果,十分開心。最後一姐重送咗一座水晶馬畀周生,祝新地樓盤繼續一馬當先。

愉景灣「避炎」勝地
至今都未有非典型肺炎個案嘅大嶼山愉景灣,發展商香港興業話,啱啱有個住喺鰂魚涌嘅客,用近二百三十萬,買咗海澄湖畔二段三十六座最後一個兩房有對流窗嘅單位,面積七百九十二呎,呎價約二千九百蚊。
原來海澄湖畔二段有對流窗嘅單位只剩八個,高座三房有三個,低座兩房有三個,一房單位就得兩個。
香港興業話,今日佛誕假期,愉景灣船隊同車隊已經預備好,等啲市民去睇完大佛,順便過嚟睇樓。

內地樓嘉年華墟冚
深圳名駿豪庭喺五一勞動節舉行首屆業主嘉年華會,聽樓盤代理置業國際講,當日共有三百幾個業主出席,場面墟冚;幸運兒重贏到價值萬三蚊人民幣嘅手提電腦。
另外,嘉年華當日亦賣出二十個單位,到周一為止,五日共賣咗六十五伙。
名駿豪庭位於羅湖蓮塘區,建有九幢十八及十九層高,同一幢二十八層高住宅,單位約一千五百四十個,面積約四百六十至九百二十方呎,呎價五百蚊。
蘭西
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載