蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年11月26日

地產多聲道:
漾日居帶記者沖上雲霄

李簡鳳玲今日會以頭等俏佳人造型會見傳媒,推介漾日居貨尾。

近排城中熱門話題除咗元朗條鱷魚,同埋區議會選舉外,相信都離唔開飛機師。皆因某大電視台近排喺黃金時段播放緊嘅「人氣」電視劇,內容正正係講飛機師同埋航空界嘅故事。
永泰亞洲就食住呢個「人氣」劇集,今日喺尖沙嘴漾日居搞記者會,唔知係咪個樓盤喺正機鐵九龍站上蓋,同機場都拉到啲關係,邀請函上面開宗明義寫話,記者會主題係「PilotSuite」隆重登場,且會有啟航儀式。
主持呢個登機儀式嘅,當然係賣樓話事人李簡鳳玲,佢會化身成為頭等俏佳人。平時,李太見傳媒,都好少有咁嘅造型。聽聞,大會重請到劇集裏面嘅男主角做嘉賓,擔任飛機師,駕駛呢個頭等艙。

英皇鐘表奪羅素街舖王
自由行魔力驚人,內地旅客最愛嘅消費品莫過如珠寶、鐘表同影音等,旺區內相關嘅店舖亦愈開愈多,其中商人楊受成旗下英皇鐘表珠寶集團,睇好自由行商機,積極擴張經營,經過多月洽商,終擊敗其他對手,以每月四十三萬,租下銅鑼灣羅素街五十九至六十一號地下舖王。
據做成呢單生意嘅喜來登旺舖代理執行董事譚嘉生講,今次英皇鐘表珠寶集團,簽咗五年租約,租金同舊租約差唔多,以實用面積七百呎計,每呎租金六百一十四元。上址業主去年以七千七百萬買入,租金回報率六厘七。

創紀之城日日換新裝
新地觀塘創紀之城五期APM,三至五樓,二萬一千方呎,已定命Xsite,專賣年輕人嘅潮流產品。
呢個場由國際著名建築設計公司Benoy設計,靈感就來自燈籠,重運用嶄新的建築技術,製造懸浮半空嘅視覺效果。
新地代理工程管理部高級策劃經理朱國傑介紹,呢幾層樓面最特別嘅地方,全部商舖均冇間隔,而且租期特短,只需要兩周以上就可以,地板唔鋪雲石,改用一啲可以一晚換新裝嘅物料,例如木板咁。
短時間內換新裝,可以不斷為商場帶嚟新鮮感,消費者每次行街都可以有新發現。

美聯內聯網解讀孫子兵法
商場如戰場,為咗要擊敗對手,美聯借用孫子兵法作為內聯網嘅教材,將其中13篇嘅精粹,剖釋乜嘢係謀略部署,內容提到甚麼五事「道、天、地、將、法」之本,「將」中有「智、信、仁、勇、嚴」等,用嚟解釋「有備無患」、「目標為本」及「知人善用」嘅大義。
另外,美聯亦會邀請對孫子兵法有研究嘅專家舉辦講座,務求令員工更懂得策略智謀,體會團隊精神。

新港城中心聖誕樹別出心裁
就到聖誕,大小商場都準備聖誕裝飾嚟迎接普天同慶節日,聖誕樹自然唔少得。
恒基地產今年花費一百萬元粉飾馬鞍山新港城中心,場內將會有一株二十呎高嘅立體舞台聖誕樹,叫做「立體SING」聖誕樹。棵樹有六層高,搭有台階,可以容納二十人喺樹上唱歌。
聽講,呢棵樹嘅設計係源自美國肯塔基一間教堂嘅聖誕樹,搭建工程將會喺今個禮拜尾完成,下月中就可以開放畀公眾參觀。到時重會請嚟唔少歌詠團同人氣歌手獻唱,洋溢一片聖誕歡樂。
蘭西
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載