› 選擇地區
三藩市
紐約
洛杉磯
其他美國地區
香港 台灣 北美
 
2004年03月25日

地產多聲道:華仔做戲 曦園攞景

《龍鳳鬥智》,就係喺呢度拍。

裕泰興董事總經理羅守耀,係電影發燒友,唔單止自己落手落腳寫劇本,就連集團旗下住宅,都好樂意借出嚟做片場。早排杜琪峯執導、由鄭秀文同劉德華主演嘅新戲《龍鳳鬥智》,就借佢舂坎角豪宅曦園取景。
記者朋友打趣問,呢排賣緊艷霞花園,點解唔借呢個盤畀人拍戲,可以收宣傳之效。羅守耀話,人哋個劇情要一間有花園嘅豪宅獨立屋,所以都係曦園適合啲。
對於人哋嘅電影拍攝,都考慮得咁周全,唔會淨係掛住自己宣傳,果然係熱愛電影。
佢重話,最近寫緊個諷刺社會嘅劇本,重話係港版《SexandtheCity》(色慾都市),初稿月內完成,希望可以搵到老闆投資開拍,如果資金充裕,佢都希望可以同杜琪峯合作,又或者搵佢做監製。

窩8轉售一個月賺20萬
為買心頭好,自然不惜腰間錢。
中原助理區域經理劉偉強話,油麻地一個商戶,原本為方便打理生意,一直都諗住入市,購買同區嘅窩打老道8號,但因左諗右諗之下,錯過咗入市機會,所以即刻轉向二手市場,物色過另一個單位。
佢啱啱用近二百一十五萬,買入二座中層D室,五九二呎,每呎三千六百二十八元。
單位原業主購入價為一百九十三萬,獲利二十一萬八,一個月淨執二十萬。

銀主盤有嘢送
樓市熾熱,交通方便或質素好嘅物業,不愁買家;位置較遠嘅,仍要諗計促銷。
卓先聯席董事潘子明話,下周三嘅銀主拍賣會,五項會有嘢送畀買家,搞吓新意思。
潘子明話,西貢井欄樹、元朗華麗苑及上水泓基花園,會送價值一萬至萬二嘅家電禮券,大埔金山花園B座一字樓,送三年差餉同地租,值一萬一千五百二,大嶼山貝澳鹹田新村十五B號地下B室,送雙人一年來回中環渡輪月票,值一萬零八十。
佢話,送家電禮券,係參考發展商嘅做法,而送船票同差餉,就係因應物業嘅位置同客嘅意見。
其實,公司之前搞嘅拍賣會,都試過買家有抽獎。佢強調,唔會因為咁而提高個價,所以呢類單位售出率都幾高㗎。

羅家寶掃貨冇停手
今年投資者掃貨頻率有幾密?睇吓羅家寶咪知。
佢啱啱又用八千五萬,買入觀塘裕民坊34至62號地下D、E及F舖連地庫。
美聯盧展豪話,間舖逾六千呎,交吉。據講暗標放售,較早時第一輪篩選,由十名準買家減至七名。羅氏最終追價近三百萬,較第二位多三十萬奪得。
翻查資料,羅家寶上個禮拜先買咗金鐘力寶中心一個單位。2月用一憶,購入尖沙嘴明輝中心兩個全層,總之未停過入市。
蘭西
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載