› 選擇地區
三藩市
紐約
洛杉磯
其他美國地區
香港 台灣 北美
 
2004年06月01日

地產多聲道:好客難求港灣收平租

以每呎十一、二蚊,喺市區只可以租到十幾年樓,但入伙約一年嘅港灣豪庭,有人唔使十二蚊就租到,皆因係好客。

好租客幾時都有着數,世紀21分行經理楊官華話,大角嘴港灣豪庭啱啱有一單超平租務,就係因為租客條件好,業主肯收平啲。呢個法籍租客,租住港灣豪庭三座高層G室,七七八呎,全包月租九千,每呎十一個六,比起市值平一成。
法籍租客住開同座兩房單位,因為租約期滿,順勢換大啲,新租單位有三房兼全海景。業主啱啱收樓,睇完租客入息證明,即刻平啲都肯租。楊官華話,呢啲係個別例子。
其實另有一單,九座低層C室,四九九呎,全包月租五千九,每呎十一個八。租客係一對夫婦,因為唔要免租期,計番咪變成平啲囉。
港灣豪庭過去禮拜日,一日有七宗租務成交,都算熱鬧。

利嘉閣 送歐遊
客人買樓,代理送禮,見怪不怪,不過以往都係配合新盤先至送,最近形勢又唔同咗,所有買家都有機會攞到優惠。
好似噚日利嘉閣北角區第五分行開業,順便宣布父親節優惠。利嘉閣執行董事廖偉強話,凡喺父親節前,幫襯全線分行買一手或二手樓,都有機會獲贈歐冠盃決賽豪華遊,名額兩個,總值六萬八。
近排代理開舖,都興送吓禮,上次世紀21奇豐沙田開舖,都送機票與酒店住宿,之前京士活送超市禮券。代理行愈開愈多,唔知遲啲中原同美聯開舖,使唔使都諗吓送乜呢?

村屋藏寵
唔少人鍾意喺屋企養寵物,奈何市區樓一般禁止飼養,所以好多熱愛寵物者,轉移物色村屋,方便照顧心愛嘅寵物。
荃灣大地主流芳置業,屬下時澤發展,最近推售和宜合村富麗臺村屋,美聯物業向該盤買家送贈一萬蚊寵物美容禮券,畀買家幫動物扮靚。
富麗臺即日發售第一座全幢,三層高,一零二六呎,叫價三百萬元,每呎二千九,第二及第三座稍後推出。

商廈造價租金背馳
舊年自由行效應,引發一輪炒風,利嘉閣高級經理關碧紅話,根據公司資料,今年四月,核心商業區甲級商廈售價指數報一四三點,比三月高十一點七個巴仙,但租金指數只得八十七點,同三月睇齊。
佢話造價「乾升」,拋離租金,情況若持續,價格下半年勢將急速回落,而且好大機會喺第三季出現。
關碧紅話,好似尖沙嘴新港中心一座十樓十五室,造價比○一年十二月高九成,可見投機氣氛幾熾熱,但租金重未返到○二年第三季水平。引用股票術語,兩者出現背馳。

信和請老記坐艇
發展商好多豪宅唔捨得賣,信和赤柱灘道7號九間獨立屋,英文名「ThreeBays」,保留收租。
聽個名,好似意有所指,蘭西於是翻開地圖查吓,物業到底係咪好似個名咁,睇到三個灣呢?
地圖顯示,個盤又真係向住龜背灣、夏萍灣泳灘同埋赤柱正灘泳灘,至於實際係點,就要實地考察過至知。
發展商安排聽日,請傳媒坐遊艇去睇,到時就可以印證蘭西有冇估錯。
蘭西
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載