› 選擇地區
三藩市
紐約
洛杉磯
其他美國地區
香港 台灣 北美
 
2004年09月25日

股壇瀏覽器:美林唱淡新地受壓

港股周四冇跟住美股跌,噚日則跌番夠本,恒指收報13066,跌213點,成交168億元。市場原本憧憬期油會炒爆煲,點知美國出埋口術話考慮動用戰略石油儲備,油價仍然進一步攀升,股市冇晒符要繼續跌。
新地(016)公布業績後被美林唱淡,話佢已經到晒價,市價高於資產淨值,將其投資評級由「買入」降至「中性」。搞到新地股價大跌3.62%;恒地(012)亦跌1.84%。地產股近期不明朗因素頗多,一來唔知加息潮會否冷卻樓市,二來地產商又唔知能否增加廉價土地儲備,兩大因素影響到地產股的資產淨值能否持續增長,支持股價向上。
地產商似乎諗住聯合行動同政府講數,叫政府在補地價方面咪企得太硬。其實講到尾,唔係市場冇土地供應,只係發展商唔願意出高價買地,如果地產商話要買平地政府就要讓步,而綜援人士要求唔好削綜援政府就企硬,咁又點講得過去呢?地產商若賺地貴,咪索性唔好起樓咯,到時市場對土地需求減少,地價自然會下滑,咁簡單的市場規律,發展商冇理由唔明。就算真係要同政府講數,都唔好咁高調啦,令阿董呢個弱勢政府難做。

華晨低位有承接
華晨(1114)一如所料因為上半年汽車銷售成績欠佳遭沽售,一度急挫逾8%,最低1.52元,不過低位承接力都頗強,收報1.56元,跌幅收窄至6.02%。最慘是其他汽車股都受拖累,駿威(203)收報2.725元,跌2.68%;長城汽車(2333)亦跌3.87%。華晨暫時在1.52元水平可企穩,以後就要睇汽車銷情會否持續下滑。
阿虎

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載