› 選擇地區
三藩市
紐約
洛杉磯
其他美國地區
香港 台灣 北美
 
2005年01月04日

股路縱橫:準備進軍澳門莊士先看1元

零五年第一個交易日,又係「濠」股世界,升幅最大係和成國際(651),高收7.1仙,升2.8仙,升幅65%,上周六先話和成捲土重來,突破三角形阻力,照度上去,上升目標指向7.5仙,估唔到1日就升到位(最高7.2仙)。
至於隻結好控股(064),話到明係1隻準寶藏股,果然噚日一早已裂口1.64元高開(升0.12元),之後就扶搖直上,衝破2元大關後,上到2.10元,中午停牌前收1.98元,大升30%。市場消息話配股,正如噚日所講,唔排除係結好大股東佐治洪同劉氏昆仲、或其他賭業人士開展進一步的合作,相信配股只係第一步,集團更大的動作會陸續有來。
噚日升幅10大中,有5隻係澳門概念股,除和成同結好外,軟庫發展(648)收12.8仙,升56%,英皇(中國)(296)高收28.8元,升38.4%,同隻祥泰行(199)收1.98元,升30.2%。英皇(中國)同英皇國際(163)(升22.9%,排第15位),今日1拆10,股價變番個零同兩個零,成交活躍好多,預期又會有一番新局面。

每股淨值1.89元
邁特(1031)整固完成,升浪再起,搶上0.57元高收,升11.7%,成交更大增到6.75億股,有消息話公司在注入賭廳業務之前,會在澳門買多一家酒店。信德(242)終於發力搶上9.15元後回收9.0元,升0.45元,係近期較大的升幅,由於已突破徘徊區阻力,後市向好,初步可向10元推進。
澳門賭業概念勁,在澳門發展旅遊、酒店和地產的股份,亦水漲船高,例如激成(184)同遠東發展(035),都見到有盤收集。
近日宣布業績的莊士機構(367),亦係另一隻寶藏,主要係佢亦會趕上車,準備進軍澳門,現正研究在氹仔和葡京賭場一帶發展酒店或住宅項目,染「濠」之後,涉足賭業或周邊業務應該會係下一步的部署。
莊士好實淨,有盈利,資產淨值每股成1.89元,股價大幅折讓60%,以噚日收市價計,市值亦不過11億元,「晒士」唔算大,要「變身」,冇話冇可能。莊士近日裂口上升後,形成旗形,一破位而上,照度上去,上升目標係1元。
郭兆誠

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載