› 選擇地區
三藩市
紐約
洛杉磯
其他美國地區
香港 台灣 北美
 
2005年01月04日

蘭西情報課:宣傳新盤不忘募捐賑災

何太(中)慷慨解囊,捐出七千五百賑災。

多家機構展開各式各樣募捐籌款活動,賑濟南亞天災,上市地產代理美記,噚日趁西環泓都新盤誓師大會,即場募捐。
九龍灣展貿會場內,聚集逾千名員工,主席黃建業,聯同新世界何伍燕榆親臨主持。現場募捐氣氛熱烈,集腋成裘,原本籌得善款九萬二千五,後嚟,何太慷慨解囊,自掏腰包賑災,捐出七千五百,令善款增至齊頭十萬。
由於今次募捐行動,現場每人捐一蚊,美聯美善會基金亦跟隨捐一蚊,所以總數增至二十萬,一併捐畀紅十字會。噚日嘅聚會,原本係推銷樓盤,亦因舉行慈善募捐,變得別具意義。

美記黃子華改行?
美記本月周年晚會,大家好投入,實行盡情玩番晚,表演節目別出心裁。工商舖行政總裁黃子華,親自主演「無間道」,飾演深入敵方嘅卧底(即梁朝偉嘅角色),歷盡辛酸,終於贏到最後勝利,令敵人棄暗投明。
套電影長十分鐘,拍咗兩日,其中一日喺旺角公司裏面拍,結局就喺當晚現場上演。佢哋做埋劇照,四主個角喺工廈天台拍,扮相夠晒cool。黃子華一向識搞笑,同影藝界嘅黃子華一樣,棟篤笑工夫一流,唔知套電影播出,會唔會畀人挖角拍戲呢?

新地省招牌
各大機構新年新部署,新地睇嚟想強化公司形象,蘭西收到佢哋寄嚟刊物,封面係「以心建家」,裏面有公司發展歷史、咁多年起過嘅名廈,同近年獎項等。
佢哋冇附任何資料或稿件,目的何在,都係靠估。唔知同舊年想拆紅灣半島,搞到群情洶湧,令集團形象失分,要加以補救,還是另有原因呢?

短期樓市散戶睇好
中原地產同城大聯手編製嘅中原城市領先指數,唔經唔覺已經面世五年,中記喺舊年十一月底,搞咗個估指數活動,邊個估到今年第一周嘅指數就有獎,競猜已經喺上個月中截止,合共收到一千一百零六份有效表格。
中原中央數據部分析啲參加者嘅競猜範圍,發現唔少都睇好樓市,而最多人估指數係五十點一二,比例達到一點八巴仙,比舊年最後一次公布嘅四十九點七八重高。結果係點,本月中就公布。

珀麗灣三人搶住要
踏入○五年,樓市走勢唔錯,二手相當活躍。港置營業經理高俊文話,最近珀麗灣一個罕有放盤,甚至吸引三個買家爭奪。
呢個十七座中層I,四百九十呎,向南,兼有青馬大橋景,同類一向唔多見放售。
高俊文話,個盤一出,即刻有三個買家有興趣,其中一個重好有誠意,親自去愉景灣,送定畀業主,終於打動賣方,以一百六十二萬買得心頭好,每呎三千三。
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載