› 選擇地區
三藩市
紐約
洛杉磯
其他美國地區
香港 台灣 北美
 
2005年01月06日

嘉華系好事近
股路縱橫:嘉國可追落後

大市前日破位而落,噚日跌勢轉急,最低潮時,恒指曾大跌335點,尾市略為反彈,收13764,跌281點,50日線(13873)亦應聲而破,且成交更大增到280億元,沽壓咁重,即使短期有技術性反彈,後市都唔可以睇好。
目前大市形成雙頂走勢,恒指連續大跌兩日,噚日低位同周一嘅高位相比,跌逾500點,跌落雙頂嘅頸線水平,照計會定一定,或者反彈一吓,然後再尋底。若雙頂形態成立,量度跌幅目標係13200。
大市雖急挫,澳門概念股仍係熱火朝天,噚日上升榜前幾名嘅股份,都係同「濠」或「賭」有關。中國金展(162)躋身賭博股行列,參與賭船業務並分紅,股價最高搶上0.86元,收0.77元,大升63.8%,高踞大升榜榜首。亞軍係華多利(1139),收18.8仙,升50.4%,公司發布與澳門俊景酒店有初步接觸,後者內有賭場,現時正進行內部裝修。第4大升幅係建美集團(851)收4.1仙,升32.2%,消息話有賭業人士睇中佢。

短線吸引力勝嘉建
另外,早日推介嘅結好控股(064),聽聞短期內會復牌,今次以先舊後新配售6000萬股,作價1.80元,比1月3日前最後5個交易日的平均收市價1.552元有溢價16%,以溢價配股係近期配股行動中所少見,亦可知接貨的投資者對公司前景幾有信心。聽聞今次接貨者包括劉鑾雄、鄭裕彤、梁安琪、李志強同李惠文,可說係鑽石陣容。結好今次配股,係壯大股東結構嘅策略性部署,新的班底應可將結好業務推向一個新境界。
嘉華系長升長有,注資行動的真命天子嘉華建材(027)再升1元,高收7.60元,升幅15.1%,嘉華國際(173)收3.475元,升8.6%;聽聞好事好快會拍板,市場有消息話股價起碼會見雙位數。
嘉建噚日市值98.4億元,嘉國持有67.25%股權,市值66.17億元,以發行20.14億股計,每股嘉國持嘉建已值3.28元。若嘉建落實注資後,保守估計股價升上10.0元,則每股嘉國單係持嘉建已值4.32元,計入其他資產,每股可值5.50元。
睇番走勢,04年9月中,兩股未升之時,嘉建0.74元,家吓升幅9.2倍,嘉國1.54元,升幅只係1.2倍,遠遠大落後,短線似以嘉國更為吸引。
郭兆誠

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載