› 選擇地區
三藩市
紐約
洛杉磯
其他美國地區
香港 台灣 北美
 
2005年01月06日

蘭西情報課:住上水皇府山包冇失禮

周國賢(中)要靠禮儀師(左)教,先識享受hitea。

新地盤鍾意走高檔,遠到上水皇府山,都話係貴族府邸。新地周國賢話,最重要係提供貴族生活模式,噚日介紹寫意生活,下午茶文化,請嚟外籍禮儀導師TessaWalker示範。
正統下午茶,好多嘢要注意,好似主人家招待客人,用匙攪拌唔可以太大聲。飲杯茶都好講究。皇府山會所內,就有AfternoonTeaHouse,重同酒店合作,逢星期日提供英式下午茶,同埋禮儀培訓。首五十名住戶,送名貴茶具,可以擺喺TeaHouse做私伙茶具。
周國賢話,皇府山等緊售樓紙,希望歲晚可以開賣,第五、六座五百伙,○六年近現樓先賣。佢又介紹相連戶,第三、七及八座都可以打通,另外重有頂樓連天台,地下連花園特色戶。

炒樓好過做董事
利記姚偉基話,尖沙嘴擎天半島二座高層E,近一千四百呎,由上市公司董事,以九百三十萬賣出,每呎六千六百幾。
聽講,間公司喺星洲上市,係大型保險商,不過,呢單交易係以私人名義登記,與公司無關。
原業主○二年十月,以六百六十萬買入,之後,以每月三萬三千幾蚊租出,回報率超過六厘。
收咗超過一年租後,業主見個市咁旺,索性連租約沽出,獲利二百七十萬。
買家係長線投資者。以最新成交價計算,回報率仍然有成四厘幾,以豪宅而言,都算唔錯。

摸舖六百單
自由行係支持舖位租售價飛升嘅主因,舊年舖位買賣註冊五千五百宗,增逾一倍,原因之一係多咗商場拆售,單係七個拆場,就導致近千五宗。
舖市咁好,自然多人炒!舊年有近六百宗摸貨登記,係九七後新高。
美記黃子華話,今年核心購物區舖位,仍然係焦點,會供不應求,用家與投資者搶舖潮持續。
中記潘志明估計,今年會有六千宗舖位買賣登記,總值四百八十億。

樓上舖搶手
零售旺區舖位缺貨,做到零售嘅商廈單位,唔少變身樓上舖,回報幾好,所以近排多咗人買嚟投資。
中記陳叔仲話,駱克道京都廣場十八樓,作價九百八十萬,租客美容院,月租五萬,回報六厘一。
另謝斐道百達中心十四樓,以四百三十八萬易手,由酒吧每月二萬五承租,回報六厘八。
稍偏嘅銅鑼灣道建康大廈四樓,造六百五十五萬,上海菜館每月畀三萬五,回報六厘四。
電郵地址:nancy@appledaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載