› 選擇地區
三藩市
紐約
洛杉磯
其他美國地區
香港 台灣 北美
 
2005年12月19日

中環在線:九龍凱悅最後聖誕

酒店係尖沙嘴地標之一,人流暢旺,曾經係唔少名人嘅聚腳熱點,好似歌星陳美齡昔日都係常客之一。

尖沙嘴近年沙塵滾滾,改路拆樓唔係新鮮事,有36年歷史的九龍凱悅酒店做埋今個月就結業,明年初動工清拆,業主鍾輝煌計劃用10億改建購物娛樂中心,預期2008年完工。有消息話,曾有人出價40億想買凱悅,但業主都唔賣。梗係啦,酒店喺正尖沙嘴中心,黃金地段人流咁旺,正係皇帝女唔憂嫁,鍾生又點會唔識計數!
講番凱悅,69年11月開業至今,開創咗唔少先河,好似推出自助晚餐、早午綜合自助餐(Brunch)及甜品自助餐,佢都係全港第一間;佢又係最早提倡HappyHour、第一家提供風水大師駐店服務。
另外,凱悅係最早一批附設的士高的酒店,旗下嘅Polaris的士高,當年係名人熱點,係超人李嘉誠都有落嘅D場!凱悅36年,經歷香港最好一段光景,係好多人嘅美好回憶,就咁拆咗佢確實係幾可惜!
曾經入住過嘅知名人士包括有披頭四、李小龍、EricClapton、JohnWayne、茱迪格蘭(JudyGarland)、AirSupply、寫《大班》一書嘅作家JamesClavell、威廉荷頓(WilliamHolden)、林鳳……呢啲名,寫寫吓都覺得滄桑!
凱悅要遣散班員工,大大話話成500幾人,其中百幾人會調任集團其他酒店,另外400幾人,酒店就一早聯絡咗本地38間同業,幫班員工搵定後路,重安排咗面試練習,事關好多員工都係老夥計,好耐未試過面試;而全酒店600個員工,加埋嘅服務年期總和有成5000年!
華華知道,酒店喺12月31日結業之後,會喺1月2日搞個告別晚宴,筵開50圍慰勞班員工,重有機票連食宿抽獎,開心告別。
李華華

相關新聞:無印開幕演奏手鈴

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載