蘋果日報 | APPLE DAILY
› 選擇地區
三藩市
紐約
洛杉磯
其他美國地區
2005年12月22日

中環在線:King's猛人多陸叔認細個

陳永陸笑說當年揀英皇唔揀皇仁,係因為King大過Queen。

早幾日去採訪恒生大班柯清輝返母校演講,得知英皇書院今年慶祝80周年校慶,安排咗好多活動,好似開放日、專題講座、校慶音樂會、論壇、再聚校園日等等,明年7月中,更會在會展大禮堂開party,到時肯定又要擺過百圍。
過咗馬路就到HKU嘅英皇,係官校中嘅名校,出過唔少猛人,淨係數財經界,就有恒生柯清輝、東亞李福善、恒基林高演、商台何佐芝、經濟日報馮紹波、長建甘慶林、嘉華許淇安、金管局李令翔、豐隆銀行譚炳勝、科大商學院院長陳家強……數都數唔晒。
陸叔陳永陸亦係英皇出品,英皇慶祝75周年時,佢重係籌委主席;陸叔話,今年自己忙,所以只係幫母校搞一個叫做「金融市場面面觀」嘅講座,其他就等人哋搞,陸叔一講起英皇就好鬼雀躍,佢話林高演同佢係預科同學,排隊時隔籬就係高佢一屆嘅柯清輝,而由於中一到中七佢都係全班年紀最細嗰個,見親乜人都叫阿哥阿姐(英皇係男校,但預科收女生),咁就無人蝦佢;而佢最緊張就係餐晏仔,每日一聽到落堂鐘聲,就第一時間跑去canteen搵位食飯,日日都係佢最快。
華華問佢點解揀英皇做第一志願,佢笑笑口話因為自己係潮州大男人,咁「King's」大過「Queen's」,所以咪揀英皇,無揀皇仁囉!
李華華

相關新聞:陳普芬唔服輸再入稟

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載