› 選擇地區
三藩市
紐約
洛杉磯
其他美國地區
香港 台灣 北美
 
2005年12月29日

財經評論:曾特首唔好誤解溫總

溫總會見曾特首,話香港經濟社會發展有「深層次矛盾尚未根本解決」。曾特首順利完成述職之後見記者,補充話「矛盾」係指香港經濟轉型未完成,係因為三高︰高工資、高地價同高租金。
利世民聽完個心抽抽吓,心諗︰「大件事,唔通香港又要走番老董舊政。」主觀願望當然希望係特首口快快,無心真係要打擊三高。老實講,八萬五嘅後遺症都未真正醫斷尾,如果再嚟一次打擊三高,香港真係想唔和諧都唔得,不過係唉聲歎氣嗰隻「嚡嚡聲」。
曾特首又解畫,話三高會影響競爭力。呢種講法同啲商會既得利益者嘅立場有幾分似。曾特首有呢種諗法,一定係耳濡目染,聽得人家講多幾次就信以為真。如果三低就有競爭力,咁北韓競爭力就一定世界第一啦,又唔見啲商家湧去平壤投資!
商家出口術要着數,唔代表呢啲係真理。商家投訴三高,無非想政府畀啲着數,例如免費批地之類嘅好處,而唔係真係要特首出手打擊三高,曾特首千祈、千祈、千祈唔好搞錯,唔係香港真係有難。

溫總心繫貧困家庭

香港有三高,係因為香港非常之有競爭力,所以人工、地價同租金先至會高。
不過話說回頭,香港經濟體系走高增值路線,冇錯係會有啲貧困家庭好難一時間適應。利世民同溫總唔係好熟,但係一聽就知溫總「矛盾論」所指,就係講呢個問題。北京高官向來都唔鍾意將啲說話講得太白,但係溫總噚日好心畀咗曾特首一個大「貼士」。
溫總公開高度評價述職嘅何厚鏵,話澳門經濟增長都係其次,最值得驕傲嘅一件事係澳門嘅教育改革。溫總係做大事睇大局勢嘅人,佢深深明白教育係助人脫貧之本。香港嘅教育使錢最多,但社會得出嚟嘅係大量雙失青年,貧者愈貧,呢啲咪就係「矛盾」囉!
溫總一番講話,其實係要曾特首搞掂教育,幫貧困家庭力爭上游。曾特首,呢個訊息你收到未?
利世民

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載