› 選擇地區
三藩市
紐約
洛杉磯
其他美國地區
香港 台灣 北美
 
2006年04月13日

中環在線:柯大俠大蝦細

柯清輝同只得八歲嘅乒乓球高手對壘,佢肉緊到連球拍都打爛埋。 程志遠攝

近日曝光率最高嘅賓卡,非恒生大俠柯清輝莫屬,上個星期,佢先後主持咗兩個公益金活動:周末同傳媒聚會唱卡拉OK,噚日就為「恒生乒乓球學院」畢業禮做主禮嘉賓,仲同小朋友打乒乓波做Show,慈善、娛樂及運動兼備,出力之餘,仲提供埋場地。
華華聽聞,大俠屋企裝修緊,雖則唔使佢煩,但多少都要畀吓意見。不過點忙都好,都要放假唞吓氣,好似嚟緊嘅復活節,佢就準備同老婆孖住飛日本,度假兼打golf。佢同華華講,呢十幾年嚟只係鍾情打golf,不過喺英皇讀書嗰陣,都有打乒乓波,仲有踢足球,家吓依然咁鍾意,只不過有心冇力啫。
今年係恒生乒乓球學院成立五周年,舊年鄭海泉仍在任,熱愛乒乓球嘅鄭大班,都有同小朋友切磋吓球技,仲打到嘭嘭聲;今年輪到柯大俠「處男下海」,佢嘅對手係今日啱啱八歲生日,鬼咁精靈嘅蘇慧音小妹妹,咪睇佢細細粒,查實佢球技了得,係學院高材生!
兩個人用咗加大碼嘅球拍,同埋張超細嘅乒乓波枱比賽,話自己好耐冇打乒乓波嘅柯大俠,一開波就肉緊到連球拍都打爛埋,好彩有後備球拍換,結果「大蝦細」,佢以7比5險勝,總算冇失威。
李華華

相關新聞:魔鬼基同巨人唔啱key

讀者如有任何意見或報料,歡迎發送電郵至LiWaWa@AppleDaily.com。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載