› 選擇地區
三藩市
紐約
洛杉磯
其他美國地區
香港 台灣 北美
 
2006年04月28日

中環在線:馮孝忠跳槽恆生

馮孝忠將過檔恒生,頂替較早前離職嘅張加銘,出任該行主管投資及保險業務的副總經理。

潮流興轉型,近期唔少資深財資及資本市場大哥都靜靜起革命,跳槽兼轉型。其中一位經常喺三大電視台亮相嘅財俊──星展銀行財資市場董事總經理馮孝忠,據聞前日通告各同事,佢老哥已經辭職,當然就冇講蟬過邊家寶號嘅高枝。經華華四處打聽,終於收到料,原來Andrew哥將會過檔本地大行恒生銀行,接替較早前離職嘅張加銘,主管該行投資及保險業務,成為恒記新任副總經理,日後向總經理梁永祥滙報。
聽聞恒生嗰邊最快喺5月會公布任命,屆時睇怕都可以搞番場滙豐舊人重聚大party,不過華華做人好小心,一切傳聞梗係要以恒生最後公布為準,事關世事始終多變。

相關新聞:李東生話知你

番書仔係活躍分子

馮孝忠一直都係讀番書,做番鬼佬銀行嘅炒房,佢加盟星展已有3年半,之前做過法興、滙豐同澳洲聯邦銀行,喺財資界屬活躍分子,今次加盟恒生,升職兼轉型做客戶組合投資,都算係一大突破。
華華又聽到另一個路邊社消息,原來身兼資本市場公會主席嘅渣打銀行環球市場債券市場部主管姚志鵬,都啱啱辭咗職,聽講又係轉型兼有好路數,但落腳點就未曝光。睇嚟財資市場,未來仲會有一輪音樂椅遊戲。
李華華
讀者如有任何意見或報料,歡迎發送電郵至LiWaWa@AppleDaily.com。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載