› 選擇地區
三藩市
紐約
洛杉磯
其他美國地區
香港 台灣 北美
 
2006年07月10日

股路縱橫:世盃收鑼玉皇朝「開騷」有得諗

美股上周五跌134點,港股今日又會趁勢調整一下,但唔會大跌,對沖基金玩「浪」,由今年3月低位15348砌上5月高位17328,升幅12.9%;又由17328插落6月低位15205,跌幅係12.2%;呢個升浪,由15205到上周五嘅16497,升幅只係8.5%,應該未夠喉,唔會咁快收手。大市短期上升目標係16800,但對沖基金可能會將佢推到上17300。
大市反覆向上,短期恒指嘅表現會比國企為強,點解?因為國企幾隻大孖沙股,包括中國人壽(2628)、建設銀行(939)、中石油(857)同中石化(386),由7月中開始到月尾都有大量窩輪到期,大戶到時到候就會做工夫,㩒到實。不過,長遠嚟睇,要搵大錢,都係要揸國企。
世界盃收鑼,巴西、英格蘭同阿根廷8強出局,雖然令人失落,但法國同意大利爭霸,亦唔算爆冷門。今朝睇完場決賽,趁今日大市調整,大家亦可以乘機回一回氣,養番好對熊貓眼,再上股場。
股市呢輪成交大減,肯定有受世盃影響,6絕之後,7月應可以翻身(起碼成交會多番)。唔單止個市,個別在世盃期間「修心養性」嘅二三線股,亦會陸續熱身,有概念嘅可優先留意。

動畫周邊產品收益可觀

玉皇朝(970)同中央電視台合作拍攝嘅《神兵小將》動畫,綠燈已開,原本6月推出,但為咗避免同世界盃硬碰(青少年嘅觀眾對象有大部份重叠),決定延期,家陣世盃踢完,《神兵小將》已計劃接住「開騷」,務求一擊即中。
《神兵小將》改編自玉皇朝原創漫畫《神兵玄奇》,並重新設計成Q版動畫,全劇共52集,首輪將在央視播出,之後分階段在其他城市的有線電視台推出,預期會繼《哪吒》之後,掀起另一股熱潮。
玉皇朝雖不會享有動畫播放時段的廣告收益,但周邊產品包括漫畫書、文具和飲品等收入會非常可觀。中國有人口13億,兒童及少年佔3.7億,以漫畫書一期銷70萬本計,賣12元,每本毛利3元,一期就賺210萬元,條數好襟計。
玉皇朝已打橫行個多月,10日、20日同50日線都在0.77元,一破位而上,中期升浪即可確認,第一個位係0.86元,整固後再上,可見1.12元。
郭兆誠

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載