› 選擇地區
三藩市
紐約
洛杉磯
其他美國地區
香港 台灣 北美
 
2006年07月10日

金手指:花旗國教金正日被共產嘅滋味

大家都知道上個禮拜北朝鮮金正日同志放火箭,幫花旗國國慶日「助興」。孫柏文亦曾經形容北朝鮮試射新式導彈為一場「世紀沙蟹局」。參與者就係北朝鮮vs花旗國。上個禮拜我都用隻金手指為大家篤過初步分析,我曾經話北朝鮮呢次一鋪清袋,原因係北朝鮮嘅新式導彈唔掂。
點知道,經過一個周末嘅反思之後,我發覺呢場唔係「世紀沙蟹局」咁簡單。其實呢場試射導彈事件,應該係一齣典型「九十年代講『賭沙蟹』嘅港產片」。如果大家仲記得當年講「賭沙蟹」嘅港產片,就一定會記得每一場沙蟹局未去到最後,你都唔會知邊一個係最後大贏家,同埋最後贏家究竟係點贏。當然,如果當時有觀眾想喺開古之前,估個最後贏家點贏,其實都可以。不過,嗰位觀眾首先要捉摸到究竟個最後贏家想贏啲乜。港產片裏面就容易估,因為來來去去都係想贏錢,最多係想贏得美人歸。

導彈唔掂應係蓄意

大家可能會問:「孫柏文點可以用港產片橋段,去分析國際形勢?」我同大家講,分析國際形勢,特別係想知道每一個參與者想贏啲乜,可能比港產片更加簡單。花旗國要嘅係北朝鮮政權倒台,跟住有親花旗國政權上台,最好就係可以將軍隊擺放喺鴨綠江旁,隨時一條大直路到北京。咁北朝鮮要嘅仲簡單,就係自保,我真心相信金正日同志去完神州遊(特別去到車水馬龍嘅廣州市)之後,都好想學我哋神州一樣,推行富中國特色嘅社會主義,搞吓開放改革。不過,金同志知道要將根深柢固嘅計劃經濟推倒,就會引起社會動盪,外國勢力亦都可以乘機搞搞震。所以要外國勢力打消搞搞震念頭,就一定要畀佢哋知道,北朝鮮政權如果因為外國勢力倒台,就要外國勢力一齊「一鑊熟」。所以佢哋先至會咁有心機去研製核彈、火箭。
講番微觀啲,今次我講話北朝鮮一鋪清袋,可能錯咗。我絕對有理由相信北朝鮮嘅新式導彈「唔掂」係「特登」嘅。金同志雖然講過好多嘢,令到大家覺得北朝鮮係完全唔想談判,不過最想傾偈其實就係佢哋。而成日都話要談判嘅花旗國,先至係對傾同唔傾最冇所謂嗰個。原因係早排北朝鮮放喺澳門嘅錢被凍結,搞到北朝鮮領導層冇得過皇帝式生活,一招打中死穴,就連花旗國自己都唔知道會咁有效。花旗國卒之知道自己佔上風,所以就慢慢來對付北朝鮮。咁北朝鮮特登搞到啲導彈「唔掂」嘅原因,就好似一個屢試屢敗,經常「玩自殺」嘅女人一樣,其實只係希望個老公睬吓佢。

剃人頭者人剃其頭

成單嘢最諷刺嘅地方,就係落實共產主義必須侵犯產權。最唔明白自己啲嘢俾人攞咗去嘅痛苦,就係共產政權嘅管理層,因為永遠都係佢哋搞人,唔係人哋搞佢。今次花旗國搞到北朝鮮嘅錢被凍結,真係可以話花旗國教金正日被共產嘅滋味囉。
孫柏文

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載