› 選擇地區
三藩市
紐約
洛杉磯
其他美國地區
香港 台灣 北美
 
2006年10月10日

股路縱橫:大型收集完成富豪發力上衝

大市創完今年新高後,調整係好正常,雖然恒指大跌200多點,但上升股(唔計認股證)仍超過200隻,藍籌回氣,二三線股會接力而上,繼續個別發展。
二三線股良莠不齊,揸到好股,好多時都要有耐性,先可以搵到大錢。今年3月底,推介中國糧油(506),理由就係佢會進行重組,結果等咗半年,中糧始落實分拆同注資計劃,股價最高升到6.35元,比半年前推介時的4.25元,升近50%。
中糧會以介紹形式分拆農產品加工業上市,但會以派發股息形式進行,另外又會以53.3億元,向控股公司收購食品及飲料業務,部份代價以新股作價5.25元支付。中糧發力,但今次重組只係第一步,好戲還會陸續有來。3月時已收到料,話中資線好睇好中糧,心目中嘅目標價係10元過外,有貨在手者,可上移止賺位,繼續持有。
浩倫農科(1073)反覆整固幾日,終於發力,最高0.65元,回收0.64元,大升10.3%,成交亦大增到近1900萬股,以突破旗形的量度升幅計,短線最小見0.72元。
浩倫係冷門股,呢輪成交轉熱,必然有因,06年度(6月年結)業績公布前有咁嘅表現,盤數應該會好靚,每股盈利保守估計有9.2仙,PE唔夠7倍,公司「細細粒」,市值2.5億元,若有基金睇中,不難會成為明日之星。
今年3月開始,浩倫走勢形成大圓底,0.70元水平整固完成後再上,中線上升目標直指1元。

分拆REITs快落實

噚日收到料,話富豪酒店(078)分拆REITs已到埋尾階段,最遲下個月就會進行。富豪分拆,起碼可以籌集幾十億元,優厚資產得以反映實值,以現時每股備考NAV1.49元計,折讓升上30%,股價都已值1.04元。
富豪已完成大圓底收集形態,噚日以1.64億股的大成交破位而上,照度上去,短線可見0.85元。
郭兆誠

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載