› 選擇地區
三藩市
紐約
洛杉磯
其他美國地區
香港 台灣 北美
 
2006年10月11日

中環在線:哥頓胡、糖王決戰九龍灣 - 李華華

九展地點偏遠,但若要起天橋連接地鐵站,胡文新(中)話佢都唔知幾時可以落實。
程志遠攝

自從上年新地郭氏兄弟喺觀塘開咗apm之後,將成個東九龍帶旺晒,連一向做投資都行快人一步嘅飛俠哥頓胡應湘,亦忍唔住要抄吓橋,將原本做陳列室、展覽同飲宴嘅九龍灣國際展貿中心改裝,變身成為集娛樂同消費於一身嘅主題購物中心,仲改咗個好潮嘅名──Emax,即係Entertainmentmaximized(意思大概係娛樂到盡)。Emax將會喺下年中開幕,到時加埋對面街糖王郭鶴年嘅Megabox同郭氏兄弟嘅apm,成個東九龍分分鐘旺過旺角。
Emax全幢8層,佔地90萬平方呎,總投資額要6個億,入面有全九龍最大嘅香港保齡球城,有成48條球道、25萬平方呎嘅綜合名車城、20幾萬呎嘅首個主題式家居博覽館,當然唔少得多用途娛樂及展覽館!董事總經理胡文新仲話,𠵱家已經租出超過五成嘅樓面面積,估計開張後,每星期人流達40萬人次。

相關新聞:眾猛人撐利Sir

Emax聽落好似啱晒一家大細玩足一日,不過當華華諗到個地點就有啲擔心,九展出名「山旮旯」咁遠,喺正九龍灣工業區,想去除咗揸車或者搭巴士,就只有搭穿梭巴士,車程雖然短短5分鐘,但等車至少要10分鐘!之前都有人提過起行人天橋直接由九龍灣地鐵站行過去,但係一直只聞樓梯響,問胡生有咩進展啦,佢就話天橋屬於公共交通配套設施,幾時落實真係唔知,不過會密切留意動向喎。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載