› 選擇地區
三藩市
紐約
洛杉磯
其他美國地區
香港 台灣 北美
 
2006年10月30日

蘋果視窗:樓盤最怕改壞名

將軍澳嘅新盤之一都會駅,十個有九個人唔識讀,俾網友鬧到暈。而半島豪庭音似「半倒豪庭」(圖)唔多老泥。
資料圖片

俗語都有講「唔怕生壞命,最怕改壞名。」改樓盤名好考技巧,改得差真係俾人笑足成世,網友jp3係《香港討論區》搞咗個「最差樓盤名選舉」,邀請各方網友提名兼發表意見,部份真係相當搞鬼。
第一個俾人鬧到暈嘅盤名就係「都會駅」,發展商想搞gimmick,用個日本字做盤名,不過網友似乎唔多接受。bb_chuchu就炮轟,駅字根本唔係中文字。呃post王就擺到明話唔識讀,「所以我通常讀成『都』、『會』、『馬』、『尺』四個音。」唔止中文名,網友三級警司就連英文名「LePoint」都要彈,「最憎啲發展商用法文當英文,一日到黑以為法國好高尚。」

夜晚返浩園嚇親司機

唔講唔知,原來元朗有個盤叫做浩園,無錯!同安葬殉職公務員嘅浩園一模一樣。呢個名亦都嚇窒唔少網友,咁又係,如果問人哋住係邊,聽到「浩園」呢個答案,真係唔知佢講真定講笑,夜晚搭的士更分分鐘嚇死個的士司機大佬,以為撞到嘢。
另外,一眾以「半島」為名嘅盤,都俾網友笑稱做「半倒」,認真唔老泥。仲有好多盤俾人改花名,例如漾日居被改成「樣樣衰」、翔龍灣變「長聾灣」、好多樓蟹嘅一號銀海,就慘變「一號火海」或者「一號銀主」、雍雅軒變「youare癲」、泓都變「暈都」、嵐岸同牽晴間調轉讀就變「戇男」同埋「姦情軒」......各位發展商,下次為新盤命名前可以考慮將個名post上討論區,測試吓網友嘅反應,費事到時畀人彈到暈喇!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載