› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

國際網絡:老婆洗腳唔抹腳點好

若你老婆喜歡買嘢,而且係大花筒,不妨使吓上述六招必殺技是否有效。

上月底,美國商務部公布9月份個人消費開支增長0.1%,反映即使油價高企,美國消費者仍然樂意消費。雖然消費唔係女性專利,但無可否認,女人買起嘢上嚟真係唔同人咁品,就好似早前上映嘅電影《天生女人購物狂》,講一個天生購物狂嘅女人好鍾意買嘢,呢個病態搞到自己連番失業兼債台高築,需要搵精神科醫生求醫。係現實生活中,如果自己唔係家財萬貫,但又娶咗個「大花筒」做老婆咁點算呢?
係《MSN討論區》,steddie_neddie就向網友討教,佢話結咗婚一年半,要供樓供車,又要養仔,仲有一筆信用卡債務要還,生活已經捉襟見肘,偏偏個老婆又唔聽話,鍾意亂買嘢使錢,碌卡唔眨眼。由於佢年紀較大,同老婆講理財之道時,就好似教女咁,搞到大家好無癮,唔知點算好?

使出六招必殺技

好多網友都認為,兩夫妻坐埋同一條船,有問題就應該坐低慢慢傾,但假如對方根本就係「牛皮燈籠」嘅話,咁就可能要出必殺技嘞﹗以下喺部份網友應付「洗腳唔抹腳」伴侶嘅毒招:
1.制訂每個月的財務預算,逼佢照跟,買嘢超過某個額就要得到另一方嘅批准;
2.佢若果唔肯跟從,就經濟封鎖佢,索性唔畀錢佢洗;
3.仲要拎走佢張信用卡,等佢連先洗未來錢嘅機會都無;
4.取消聯名戶口,要佢用自己嘅錢還債,自食其果;
5.大屋搬細屋,畀佢知道入不敷支嘅後果就喺節衣縮食;
6.正所謂「江山易改,本性難移」,如果真係頂佢唔順,惟有saybye﹗
不過,俗語有話:「寧教人打仔,莫教人分妻」,如果覺得見死不救太殘忍,不妨考慮網友alinal11嘅建議:節流無效就要開源,做多幾份工賺錢,只要收入多咗,咁另一半就算使多咗都唔怕啦﹗

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載