蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年12月20日

中環在線:百富勤煙消雲散 - 李華華

唔知近排大家抽新股之餘,有冇留意海天國際(1882)本招股書呢?如果大家細心睇吓,會發現海天本招股書上面個保薦人嘜頭,已經變咗「BNPPARIBAS」再加4粒星,再唔係以前嘅「法國巴黎百富勤」。原來一代股壇游隼百富勤(因為百富勤英文名Peregine便是隼。而隼屬鷹的一種),終於正式謝幕退場。
華華八卦所得,中文名叫法國巴黎融資嘅BNPPARIBAS,喺年頭已開始搞重組,目的係將百富勤融入集團,而法國巴黎百富勤呢個自98年沿用至今嘅過渡性嘜頭,亦正式喺今個月完成歷史任務。聽講話,佢哋自己喺本月7號已經全部改用法國巴黎融資,連電郵地址都改埋。
由於改名係喺今個月發生,好多招股書裏面嘅名都有啲出入,好似佢哋有份做副牽頭經辦人嘅株洲南車(3898),佢哋仲係用緊法國巴黎百富勤個朵。
而佢自己做保薦人,喺上月底開始招股嘅錦江國際(2006)就未改,要到海天國際招股,先至用新名。

相關新聞:恒隆數學獎評判大晒冷

法國佬好畀面

有老前輩同華華講,其實自從百記賣盤畀法國佬後,當年百記嘅人都差唔多走晒,今次正式搣咗百富勤個名,應該都唔會有乜人會感到傷感啦!老前輩仲話,其實法國佬買咗百記咁耐先搣咗個名,都算畀足面啦!唔知百富勤創辦人之一梁伯韜有冇感觸呢?
講開又講,既然梁伯韜收購電盈(008)失敗,而家百富勤個朵又回復自由身,加上近排啲中國概念又咁得,唔知佢會唔會想攞番個名再創業呢?
LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載