› 選擇地區
三藩市
紐約
洛杉磯
其他美國地區
香港 台灣 北美
 
2007年02月26日

國際網絡:五成英青年已做債仔

英國《每日電訊報》引述當地一家個人理財教育組織的調查指出,英國半數青少年未滿17歲就欠債,其中唔少人甚至認為負債係一種生活方式。

做好榜樣 唔好欠債

調查訪問咗1000個年輕人,結果發現近四分一受訪者認為,銀行透支有助佢哋每月消費可以多過所賺嘅錢;五分一認為信用卡可以令佢哋買到負擔唔起嘅物品;最誇張係有50人以為佢哋根本唔需要還卡債,認真要不得。難怪組織負責人提醒父母做好榜樣,確保子女成年後有足夠理財能力,同埋畀佢哋知道自己需要承擔嘅責任。話雖如此,但到底有幾多父母會同仔女討論理財問題呢?
網友NightOwl07喺《MSN》嘅討論區問:「如果子女問有關家庭財政嘅問題,如每月搵幾多錢或有幾多身家等,應唔應該答佢?真係講畀佢知,又應該透露幾多資料呢?」
Pappy97回應話:「父母搵幾多錢,唔一定要畀子女知嘅,佢哋知你有錢,可能仲會扭計買嘢或者要求增加零用錢㖭﹗」
schildi:「15、16歲嘅時候,爸爸曾經好詳細同我講關於佢嘅收入、為咗咩目的而儲錢等,令我可從中學到唔少理財嘅知識,透過討論建立互信。但如果子女只得幾歲,就唔需要講太多錢銀嘅嘢,容乜易佢哋返到學校周圍同人講㗎!」
rubyshoes抱怨:「我都係讀中學時申請政府資助,見阿爸填申請表先知佢搵幾多錢咋。我仲記得當時佢年薪有10萬美金,於是我就好唔明點解叫佢買一對價值80蚊美金嘅波鞋,佢都話買唔起囉!唔買對鞋唔緊要,我覺得佢嘅薪金反正都披露咗,好應該趁機教吓我理財之道,如儲錢交稅、買保險、要預備一筆錢退休等,偏偏佢就白白錯失一個教育子女理財嘅大好機會。」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載