› 選擇地區
三藩市
紐約
洛杉磯
其他美國地區
香港 台灣 北美
 
2007年02月26日

敏妮Talk:炒股睇性格贏輸冇時定 - 溫敏妮

自從踏入豬年,邱Sir就財源滾滾,每日喺股市幾千幾千咁執,相反股王A就話自己有贏有輸,冇乜斬獲。
股王A:「唔通真係犯太歲,冇理由成績咁差。」
邱Sir:「咁我今年就一定係財星高照喇。」

非關流年運氣事

Chiling:「股王A你輸好多股票咩?」
股王A:「咁又唔係,冇輸冇贏,運桔咁囉,激氣嘅係我真係揀啱股,但隻股唔升,反而啲股仔就係咁升。」
Chiling:「敏妮,一向股王A揀嘅股都好過邱Sir,唔通股王A真係流年不利。」
「股王A算係咁喇,我個friend仲差,買親嘅股都唔郁,唔似佢老公日日賺錢,仲因為咁俾佢老公揶揄。其實我覺得同流年、運氣冇關,主要都係大家炒股性格唔同。」
Chiling:「炒股都講性格?」
「好似打麻雀咁,有人鍾意做牌,食親都係爆棚;有人就鍾意不斷食雞糊,密食當三番。」
股王A:「就好似炒股有人鍾意睇長線,即係信奉價值投資嗰套;有人就鍾意短炒,升一兩格就沽貨。係咪呀敏妮?」

短炒長揸唔同格

「講得啱,近排港股升嘅都係三、四線消息股,邱Sir呢啲唔理基本因素,就算係技術分析都係瞄瞄就算,即使係中移動(941)呢啲藍籌,佢都唔會長揸,一日走幾轉,每次賺幾格,喺𠵱家個市就最適合。至於我個friend,要返工又要掛住湊囡囡,雖然同班fund佬熟,聽到唔少消息,但就寧願分析過先入市,𠵱個市佢淨係齋睇。相反佢老公同邱Sir一樣,咁咪成日俾老公取笑囉。」
Chiling:「但股王A短炒、長揸都有心得噃。」
股王A:「要做到長揸又得,短炒又贏,好難㗎。當你叠起13隻牌,索子、萬子、筒子、番子乜都有,你就唔使諗,快快趣有雞糊都食啫;叠起牌已經6、7隻索子,做慣牌嘅,梗係做埋佢啦。」
Chiling:「講開都好耐冇打過牌,幾時開枱啫?」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載