› 選擇地區
三藩市
紐約
洛杉磯
其他美國地區
香港 台灣 北美
 
2007年03月09日

中環在線 查懋成:搞海上海洋公園 - 李華華

香港嘅優美海景世界聞名,最適合搞水上活動,仲可以順手帶旺埋旅遊業──呢個建議唔係華華諗,其實係香港興業董事總經理查懋成諗㗎。
噚日集團喺中環同傳媒飯局,查生爆料,話當年政府呼籲商界提交振興旅遊嘅建議,佢哋咪搵專人做份報告交畀政府囉,可惜最後石沉大海,完全冇回音。
查生指香港擁有海港優勢,內地可以競爭嘅省市唔多,應該加以發揮,但一直冇好好利用。好似講到明同海洋有關嘅海洋公園,竟然起喺山度,係咪叫「山洋公園」至啱,啲海豚要叫山豚至得呢?佢批評咁樣成本貴之餘,再擴充都唔易,唔明點解唔起響海邊?咁咪仲切合公園主題。
佢話個海洋公園若果起喺海邊,只要用薄薄一塊玻璃,就可以分隔到公園同海洋,係咪好正呢?而且仲可以大搞如賽艇等水上活動,甚至搵埋滑浪風帆金牌得主風之后李麗珊嚟教,夠晒號召力。
當然,𠵱家海洋公園畀主席盛智文搞到有聲有色,查生當然唔建議執咗佢,但認為喺海邊起多個都無妨,或者可以畀埋海洋公園經營㖭。

彈中環行人天橋殺風景

講開海港,查生又指住中環海旁新建而仲未啓用,連接中環碼頭同地鐵站嘅行人天橋,猛話設計好差,係幾十年前嘅風格,同周圍唔夾,影維港相時會影晒條橋,認真大殺風景。
講開影相,原來查懋成係攝影發燒友,集團近兩年嘅月曆,好多相都係佢嘅大作,佢最近就返咗內地阿爾金山影藏羚羊,嗰陣時氣溫得零下28度,空氣又稀薄,若果唔係發燒友,身嬌肉貴嘅查生又點肯咁辛苦呢?
LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載