› 選擇地區
三藩市
紐約
洛杉磯
其他美國地區
香港 台灣 北美
 
2007年05月29日

國際網絡:美大學生憂飯碗不保

中國內地大學生越嚟越難搵工,反觀美國大學生就比較好彩。美國全國大學與僱主協會(NACE)負責人早排話,應屆大學畢業生嘅就業市道顯著改善,面試同工作機會都多咗,起薪點亦有提高。不過,美國年輕人仲係擔心能否搵到一份既穩定又有前途嘅職位。bunchargum喺《MSN討論區》呻:「我25年前大學畢業後,試過好多次俾公司裁員、炒魷,好在我有攞失業救濟金,加上一早儲定筆錢,都可以勉強維持生活。」
Beergut回應:「一個人如果攞慣救濟金,會變得懶散,唔急於求職,不知不覺就失業半年。失業時間太長,面試官會覺得你有問題,更加唔想請。」

30%職位屬臨時工

horizon話:「美國勞工部網站資料顯示,美國人一份工平均只做1.6年,照咁睇,美國真係冇乜就業保障。」Seachange-on-the-horizon講:「啲新移民又勤力又醒目,教育程度又高,自然容易搵工,令唔少土生土長嘅美國人失業。」
TLoony話:「喺名牌大學畢業嘅人,好少會失業。」Deminmaine就反駁:「一個人教育程度越高、越專業,就越難搵到合適嘅職位,所以失業時間會長啲。」IHearYou2講:「一個人應該喺多方面發展,將自己嘅技能多元化,咁樣就會更易搵工。」
美國勞工市場現時有30%職位屬於臨時、短期或者兼職性質,除咗人工冇任何福利,咁樣公司就可以慳番唔少成本。由於好多工係臨時工,員工嘅職業培訓或事業發展機會比較少,唔少年輕人被迫經常轉工,覺得生活缺乏保障,難以對職業生涯進行長期規劃。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載