› 選擇地區
三藩市
紐約
洛杉磯
其他美國地區
香港 台灣 北美
 
2007年05月29日

敏妮Talk:一個公告搵炒股靈感 - 溫敏妮

「棺材仔」破案關鍵在於唔放過任何蛛絲馬迹。 資料圖片

近排敏妮忙通頂嘅機會少咗,有時間睇到翻播嘅陳年舊劇《洗寃錄Ⅱ》,呢套戲畀到大家一個信息──
唔好放棄任何蛛絲馬迹。
噚日,招商局(144)出咗個董事變更公告,副主席兼執行董事趙滬湘辭職,公告有3頁,主要係介紹繼任人,對趙滬湘辭職只得兩句,就係佢有新工作安排,同埋辭職上周五正式生效。不過,短短呢兩句說話就觸動咗股王A嘅炒股神經,點解?

招商局公告有玄機

先睇趙滬湘背景,佢除咗戴住招商局副主席頂帽,仲係中外運(598)總裁;兼職日子由05年12月開始,數數吓都有年半,到家吓選擇留任中外運而除咗招商局頂帽一定有原因。
再睇招商局同中外運啲新聞,睇吓有乜玄機。幾年前,國務院國資委為咗整頓過多又良莠不齊嘅中央企業,定咗個規則,只有行業前3名先有得留低,其餘就要同其他企業整合。喺航運業嚟講,頭3位嘅公司分別係中遠(1919)同中遠洋(1199)阿媽中國遠洋運輸、中海發展(1138)同中海集運(2866)阿媽中國海運總公司、中外運阿媽中國對外貿易運輸(集團)總公司,至於中國長航同招商局集團就排第四、五。

中外運整合快出台

雖然招商局集團三甲不入,但航運只係佢主業之一,而且已經喺大陸上咗市,所以急住要壯大嘅係長航,亦一直有報道話長航會整合重組。
講完一輪,你可能仲未有頭緒,試吓當自己係歐陽震華飾演嘅「棺材仔」,趙滬湘辭任招商局副主席係因為有新工作,好明顯,佢喺中外運嗰邊應該有新任命;之前有報道話,長航同中外運重組方案已經遞咗畀國資委等緊批,如果冇估錯,上頭應該批咗,所以趙官要抽身等做長航同中外運重組之後新架構嘅揸fit人。
中外運加埋長航一躍排第二,淨係炒中外運重組概念都知股王A點解咁興奮;但隻股噚日跌咗,佢諗住確認跌到3.43元就止蝕。如果佢眼光冇錯,就憑招商局公佈兩句話,唔使等貼士你都做到股神。
上個禮拜五,敏妮賣咗個關子,話除咗雨潤食品(1068),仲有一隻「豬瘟」概念股,聽日開估。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載