蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年06月21日
馬上成為壹會員

中環在線:阻睿富上市領匯翻版 - 李華華

睿富向佳程房地產開發買入北京佳程廣場(圖),佳程房地產開發今鋪仲裁唔知有冇打擊睿富上市後股價表現?

近期新股表現一般,上星期掛牌嘅天能動力招股期間受到鉛污染影響,當時即澄清件事已經解決,冇再受到村民投訴或索償。聽日上市嘅睿富房托,亦有相似遭遇。
話說睿富招股截飛冇幾耐,就爆出京懋中國資產管理公司,向佳程房地產開發公司追討管理費700萬元人仔。原本佳程應該由05年起每年科水120萬美金管理費,但佳程至今只畀咗70萬元人仔,於是京懋就透過仲裁追討款項。睿富上市集資,正正係向佳程房地產開發買入北京佳程廣場。呢單嘢唔遲唔早,傳媒正正喺睿富招股截飛當日收到,唔通有人想抄盧婆婆條橋,阻呢隻Reit上市?

搵法律顧問做功課

睿富噚日發通告,澄清仲裁申索係針對北京佳程房地產開發,而唔係上市公司睿富嘅一部份。睿富仲自動波問埋中國法律顧問意見,話即使仲裁申索成功,都唔會對睿富持有佳程廣場嘅業權產生不利影響,更加唔會對佢產生任何留置權或產權負擔,甚至對上市都冇造成重大不利影響;咁即係好難做領匯翻版啦。
講係咁講,但天能動力上市後股價表現平平,今個星期已經跌穿招股價,睿富上市後股價表現,就睇投資者對佢有冇信心喇。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載