› 選擇地區
三藩市
紐約
洛杉磯
其他美國地區
香港 台灣 北美
 
2007年06月21日

金手指:飛車搶劫 當場擊斃 - 孫柏文

葉劉做特首嘅世界中,將會係咁「果斷」! 互聯網圖片

上個禮拜,葉劉淑儀話當年人大,監粗取消基本法保證所有香港居民兒女嘅居港權利,係「好果斷同有必要」。首先,當年殖民政府年代,雖然有好多人好怕共產黨解放香港,不過憑基本法22、24條,話香港居民兒女就有居港權利,就贏咗好多有非本港子女嘅香港家長歡心。
雖然當時仲有人日日歌頌彭定康,希望可以永遠攬住英國人嘅大髀,不過呢班家長就日日祈禱,希望解放軍可以快啲嚟,基本法可以快啲落實。經過人大取消權利之後,呢班之前最支持基本法、最期望解放嘅香港人家長覺得點?孫柏文相信當年放喺灣仔人民入境事務處嘅幾個汽油彈,已經講得好清楚。深愛一個人,佢又畀咗你好多希望,不過最後俾佢捅一刀嘅感覺,呢班家長就最清楚。
我想問葉劉:「你話嗰百幾萬個非本港子女嘅香港家長,會唔會覺得回歸10年值得慶祝呢?要睇幾多次『心繫家國』MTV先至會重新愛國愛港?如果有成百幾萬個子女,啲充滿仇恨嘅香港家長,為數又有幾多?」葉劉參選08立法會選舉,就真係要多謝多議席單票制。
其實,好多喺特區對阿公抱着愚孝處事方法嘅人,都好似葉劉咁好鍾意政府「果斷」。
越「果斷」越好。越「果斷」越有效率,越「先進」。
喺葉劉做特首嘅世界當中,唔同意行政部門嘅決定,走去打官司,走去司法覆核,就係一個唔愛國嘅表現。因為會令外國人覺得特區政府無法「果斷」。所以今日就為大家提供咗一張圖片,畀大家知道葉劉做特首將會幾「果斷」。

輪商輸錢 我有快感

孫柏文相信喺特區股壇,輪商係第一被仇視嘅對象。雖然本人就對某輪后有個crush,不過撇除兒女私情,都絕對明白點解大家咁仇視佢哋。孫柏文絕對明白乜乜引伸波幅會影響啲輪嘅定價,不過都仲仇視佢哋嘅原因,就係因為佢哋好似永遠都冇得輸咁。
點知,噚日同法國巴黎銀行窩輪部嘅朋友傾偈,孫柏文條氣順晒。因為佢話輪商雖然日日都賺你,不過賺埋賺埋可以一鋪過輸晒。例子有中石油,佢話對上六個月,中石油試過三次裂口高開(見附圖),輪商想追做對沖,點知一路追唔到。佢話相信好多輪商,喺呢三個交易日蝕咗嘅錢,就已經輸晒全年喺中石油出輪嘅盈利。唔好話我黑心,不過見輪商輸錢,真係令我有快感。我係咪變態?
金手指網誌: http://phatdat.blogspot.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載