› 選擇地區
三藩市
紐約
洛杉磯
其他美國地區
香港 台灣 北美
 
2007年06月21日

敏妮Talk:炒股要揀自己熟悉嘅行業 - 溫敏妮

呢幾日個市係咁升,尤其啲好「王道」嘅大價股,搞到好多平日唔炒股嘅朋友問,「敏妮股市仲有冇得升?之前升嗰啲細價股,我唔敢炒,𠵱家升嗰啲係大價股、藍籌,我想買番啲好唔好?」
當呢班朋友問埋啲咁嘅問題,敏妮都會開始盤算,個市可能就嚟見頂,不過,為咗唔得失好朋友,敏妮都只係勸佢哋小心啲,因為佢哋平日唔炒開股,到佢哋揸定主意,個市都升到水尾,佢哋入市都係接火棒。

用肌膚感受市場

其實,做乜嘢事都一樣,唔熟唔做,敏妮記得,恒隆地產(101)執行董事吳士元經常講,「要用肌膚感受市場」,敏妮好同意,一個遠離市場嘅人,見人哋炒股賺錢,以為可以搭順風車,邊有咁着數,所謂不熟不做。
講開不熟不做,聽股王A講,有個朋友炒股冇佢咁叻,但就好值得敏妮呢啲「唔爛炒」嘅散戶學習。呢位仁兄,工作關係經常會收到好多外國資訊,尤其關於油價同金屬價格嘅消息,所以佢炒股專注喺呢兩瓣,話之地產股、銀行股炒到飛起,佢一概唔掂。
石油同金屬呢兩個sector嘅上市公司再多,數埋咪幾十間,所以佢可以好深入研究呢啲公司同行業發展,由於專注,所以佢好熟悉行業變化,對每家公司動向、背景瞭如指掌,往往可以掌握到升勢,飲頭啖湯。

專注炒股莫分心

其實散戶炒股都應該學吓呢位仁兄,家陣香港上市公司過千家,就算你係四叔、六叔都唔係隻隻識,不如就由身邊最熟悉嘅行業入手,好似你係做零售嘅,咪專注炒零售股囉,零售市道好唔好,你做零售嘅都唔知咩,其他散戶要等政府出嘅零售數據先知市道好唔好。
除咗揀自己熟悉嘅行業,敏妮建議你搵多個sector,分散風險,因為每個行業都有高、低潮,咁啱你個行業低潮,隻隻股都跌,都要搵個第二個sector炒。
最好係同行業相對嘅,例如航空股同油股、煤股同電力股咁。
http://manlitalk.com/blogs/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載