› 選擇地區
三藩市
紐約
洛杉磯
其他美國地區
香港 台灣 北美
 
2007年06月21日

股場放大鏡:炒回歸A股中油香港最抵博 - 歐陽風

呢個星期推高恒指同H指嘅主力股份,除五行三保之外,應數中移動(941)同埋中石油(857),而呢兩隻市值咁大嘅股份,都係主要炒回歸A股,前者據通訊社報道,最快下個月在國內發行A股集資800億元,雖然將創下國內IPO融資紀錄,但係只佔中移動現市值16000億嘅僅僅5%。
中石油更快落實,噚日已發出通告,「欣然宣佈」待股東會通過後會正式申請發行A股。通告話計劃發行不多於40億股,以噚日收市價11.74元計,涉資約470億元,佔H股現市值約18%。以國內股市規模,好易食得晒以上IPO,相信未來一段時間,市場焦點將會係IPO熱潮。
亦都可以肯定,炒回歸A股係呢排最好炒嘅概念。據報載,中證監對境外紅籌企業回歸A股市場設立門檻,初步為在港上市交易1年以上、市值不低於200億元及最近3個會計年度累計純利不低於20億元。
符合市值要求的大都已符合盈利要求,上埋幾隻大嘢如中海油(883)同網通(906)後,再數落去,係時候炒定華創(291)、招商局國際(144)及中油香港(135)等中游分子。當中又以中油香港最抵博,外資行報告早排紛紛講佢股價未能反映應有價值,再係咁私有化都有之,發A股時睇怕應該有人會識貨炒番起佢。

中國食品跌得過份

講開紅籌股,原稱中糧國際嘅中國食品(506)自分拆中糧控股(606)後幾乎只跌不升,以除淨後合理價6.2元計,去到噚日收市4.8元已跌去22%,同期紅籌國企各有各升,而且同期國內食品價格漲價,照計無理由股價跌得咁緊要,估計為收取中糧控股派送嘅基金,都應沽得七七八八,現位買有相當高嘅值博率。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載