› 選擇地區
三藩市
紐約
洛杉磯
其他美國地區
香港 台灣 北美
 
2007年08月17日

金手指:泡沫爆破後 坐監大熱門 - 孫柏文

1999年,科技股泡沫膨脹之際,如果你問我泡沫爆破之後邊個會出事,真係諗都諗唔到做能源嘅Enron會倒閉,做會計嘅ArthurAndersen會執笠。以上兩間公司係咪抵死,相信大家心中都有自己嘅結論,不過科技股泡沫爆破死得最無厘頭嘅,肯定係教人煮餸嘅MarthaStewart居然要鋃鐺入獄。
當時,Martha買咗少少研究抗癌藥物叫Imclone公司嘅股票。咁Imclone有隻好勁嘅抗癌藥叫Erbitux,不過隻藥勁都好,花旗國食物及藥物管理局就突然阻撓隻藥嘅認可過程,令隻藥可以賣出街嘅時間被延誤。
管理局出決定之後嗰日,孫柏文記得連《華爾街日報》嘅社論都大肆批評管理局「害死」啲需要呢隻藥嘅病人。
Martha出事嘅原因,就係佢喺管理局出決定之前,突然放晒啲Imclone股票。因為Martha之前同Imclone總裁拍拖,所以就涉嫌用內幕消息交易。政府查咗好耐,一路都冇證據證明Martha做錯,不過因為Martha「走得快、唔使蝕」,所以政府面對花旗國股民群情洶湧要求「交人祭旗」嘅訴求,最後就屈咗Martha幾條「不合作」嘅罪。

落重注買CountrywideCEO

花旗國就係咁,好多時啲人變成暴徒,政府裏面嘅檢察官面對龐大壓力,就算你冇做錯,都會被拉坐監。
噚日,花旗國最大嘅按揭中介公司CountrywideFinancial,卒之宣佈會動用所有之前講到好大嘅creditline,攞現金。股價當然應聲下挫。如果叫我買,喺呢個風暴當中最會好似Martha咁,就算冇證據證明做錯,都要坐監嘅人,我一定落重注Countrywide行政總裁Mozilo。佢年頭至今,一路都賣手上嘅Countrywide股票,而股價就由1月45元跌到噚日嘅18元,佢「走得快、唔使蝕」,就應該會變成暴徒嘅標靶。

都唔知要救邊個

最後,噚日同Rapiere傾偈,佢要我解釋究竟金融市場發生乜事,點解花旗國出事,特區、歐洲都大跌市。我話基本上最大問題,係市場唔知道邊個有份承擔風險,想救都唔知救邊個。
Rapiere慨嘆,中央銀行已經成為當年喺越南嘅美軍一樣,有更多嘅子彈,都唔知射乜同射邊度。
金手指網誌: http://phatdat.blogspot.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載