蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年08月17日
馬上成為壹會員

敏妮Talk:跌得多唔代表抵買 - 溫敏妮

名牌減價都要睇吓係咪抵先好掃貨!

噚日港股一度跌成900點,敏妮返到公司見到秘書Chiling同光頭仔鬼咁開心,因為佢哋同敏妮一樣,晨早清晒啲舊貨。
不過,見Chiling猛㩒股票機,就知佢又手痕想買嘢,「敏妮,我之前已經好想買太古(019),仲有隻國壽(2628)跌咗咁多,真係好吸引。」

大減價失理性

睇到Chiling一邊㩒股價機,一邊話邊隻股平,就令敏妮諗起公關C。前排公關C收到一眾名牌privatesale嘅e-mail,急call敏妮話要去掃貨。
呢啲名牌嘅privatesale,唔係一般大減價,要有invitation先去得。當你見到啲名牌鞋原價幾千蚊,家吓一律三嚿水,任何女人都會失晒理智,所以每當入到呢啲privatesale會場,就會發現平時高貴優雅嘅女士變臉,同一時間一手擸住幾條裙、隻腳試緊幾對鞋,隻眼仲昅住身邊嘅手袋。公關C都一樣,一到呢啲場面就失控,結果買埋啲衫,其實唔啱佢一貫style,着唔夠一兩次就唔着。
股市大跌,好多名牌大價股跟住個市跌,Chiling嘅反應就好似去名牌privatesale嘅女士一樣,雙眼發光,見到乜嘢都只係發出一個音——「抵」,但究竟乜嘢叫做「抵」呢?
名牌點解要減價賣?係因為當新一季來臨時,上季嘅貨就唔值錢,趁佢仲有啲剩餘價值,所以早啲清貨。不過,同一個名牌,唔係件件貨都勁減,就好似某隻牌子嘅亁濕褸,即使減價,減幅都好有限。

睇PE咪亂掃

同樣,名牌股雖然跟住股市跌,但都有質素之分,單係因為跌得多就認為平,好易捉錯路。其實,敏妮見到呢啲大跌市都會心動,尤其幾隻心儀嘅股都跌嘅時候,但大家唔好忘記股票平貴,係睇PE,從來唔係睇佢跌咗幾多。
http://manlitalk.com/blogs/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載