› 選擇地區
三藩市
紐約
洛杉磯
其他美國地區
香港 台灣 北美
 
2007年08月28日

中環在線:大陸地產商怕記者 - 李華華

上個禮拜,睇到香港首富指住記者話:「儍嘅!」呢個經典場面,感觸最大嘅,華華相信一定唔係各位記者嘅父母親(雖然仔女俾人指住話儍),而係大陸嘅地產商。喺香港,地產商惡晒;但喺大陸,地產商最怕就係記者。唔信?以下有兩個真人真事,唔到你唔信。

【事件一】碧桂園(2007)能夠喺香港畢菲特李兆基嘅「實聽升的名單」裏面佔一席位,當然受散戶追捧,話說碧桂園主席楊國強同四叔都係順德人,華華當然要問吓楊主席一場嚟到香港,有冇拜會吓四叔啦。

Dum地走人

楊主席支吾以對話冇。一場落到嚟都唔探吓人?唔係啩!可能楊主席經唔起華華嘅苦苦癡纏,居然「Dum地」!冇錯,係好似細路仔扭計咁「Dum地」!華華嗰一刻唔識反應,正猶豫好唔好攞袋入面包朱古力𠱁番佢嘅時候,楊主席就閃咗。
華華睇得出,楊主席真係一個好有真性情嘅人,淨係睇佢成日叫記者感受吓佢嘅感受,就已經知道啦。
仲有,喺噚日嘅業績記者會上面,華華發現碧桂園賣樓毛利率有四成咁多,平均地價成本只係每平方米200元人民幣,平到不得了,所以好奇問佢點解可以買到咁平嘅地,點知楊主席可能敏感得滯,一輪嘴講咗一抽嘢……(下刪一千字),大致上係話公司以正當合法途徑買地,犯法會槍斃云云,搞到全場爆笑。

【事件二】萬科雖然喺大陸上市,但每年都會落嚟香港見吓記者,講吓公司業績,噚日萬科董事長王石又落嚟香港,佢一見到華華就呻:「大陸傳媒話我講泡沫會喺兩年後爆破──我冇講過,我從來冇講過個泡沫會兩年後爆。」
聽到華華一頭霧水,原來6月中王董出席一個活動時,同記者講:「內地房價漲得過快、升幅過大,已經出現泡沫,泡沫早晚都會破裂。」點知《上海證券報》喺19號嘅報道引述王石講:「內地樓市泡沫破裂只是時間問題,也許是兩三年,也許用不着那麼長時間。」再經其他傳媒轉述,就出現咗「王石:房產泡沫兩三年結束」之類標題。

以訛傳訛王石遭殃

王石見到啲報道,即刻喺佢個人網誌《王石的博客》上,以《阿貓阿狗賺錢的時代》為題,寫話:「我從未有過『房產泡沫也許兩三年就結束了』的言論。」仲引述自己當時答:「房地產當然有泡沬,當房地產價格上升速度,長期快過居民收入的增長速度時,泡沫就產生了。」又話自己唔係算命先生,無法預測後市。
佢噚日再重申,內地樓價係有啲泡沫,股市亦偏高,包括萬科股價都係,但泡沫幾時爆唔知,家吓可以做嘅,係將樓宇質素做好,最重要係,佢一定唔會做提高樓價嘅帶領者喎。
LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載