蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年08月28日
馬上成為壹會員

中環在線:中石化高層最多老虎 - 李華華

原來蘇樹林(左)同王天普都係老虎仔。 程志遠攝

陳同海出事後,空降司令蘇樹林唔經唔覺已做咗中石化(386)大股東、中石化集團總經理兩個幾月,噚日第一次嚟香港主持業績記者會。佢臨危受命首要任務係穩定局面,𠵱家提前做到,所以今次同埋總裁王天普、財務總監載厚良齊齊出去路演。傳媒問佢陳同海現況,佢就點都唔肯透露半點風聲。
不過,講到今次路演陣容,蘇樹林就話,同王天普同係1962年嘅老虎,一個上半年出生,一個下半年出世,咁啱佢一直喺中石油搞上游業務,王總裁就專長下游業務;至於細一年嘅載財神就肖兔,佢哋嘅生肖可以反映中石化作風,即係既具開拓精神又小心慬慎喎。咁都得?
曾經喺中石油做咗23年嘅蘇樹林話,06年9月19號被調去遼寧做省委同組織部長時,冇諗過有重返石油業嘅一日,所以乜嘢資料都冇帶就上飛機,估唔到9個月後又被調返北京,仲做埋中石化老頂。家吓諗番轉頭,佢話:「喺中石油嘅時間,係個人重要嘅成長期,尤其喺大慶學曉咗做人處事,喺遼寧就學識咗人事組織,擴闊咗視野,對一生走好下半段路好重要。」蘇總呢番話,似退休前臨別贈言多過新官上任演詞噃!

王天普醒目仔

噚日,華華仲見到6月時,因為唔知點回應陳同海問題而面黑黑嘅王天普,佢噚日神情已經輕鬆咗好多,仲整咗個總結發言,話蘇樹林上任後唔單止好快進入角色,仲指點大家點樣安全生產,提出揚長補短策略。嗱,舊嘅唔好提、新嘅捧多啲,呢啲就係職場醒目仔嘞!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載