› 選擇地區
三藩市
紐約
洛杉磯
其他美國地區
香港 台灣 北美
 
2007年08月28日

金手指:一注獨贏買江銅「到價!」
- 孫柏文

多謝各位《金手指》fan屎支持!
孫柏文喺今年4月10日,叫大家「一注獨贏買江銅」。咁江西銅業(358)喺4月9日嘅收市價,就係10.32元,不過到4月10日開市時,已經裂口高開,開市價10.8元。
冇辦法,《金手指》嘅「一注獨贏」品牌,實在太強,所以裂口高開不足為奇。當日,我為大家提供咗16元嘅目標價,以建議日開市價嘅10.8元計,即係話會升48%。到噚日,江銅就成功升穿我嘅目標價。
4月我建議大家買江銅嘅理由,係因睇江銅06年第三季業績,當時銅價維持大約7600元1噸,江銅就賺大約0.5元。只要全年銅價平均喺同一水平,江銅就會賺2元一股。呢個盈利計算已經非常保守,因為完全假設江銅嘅生產量冇增長。
只要市場覺得銅價能徘徊7600元1噸水平,而唔係泡沫,市場可以接受江銅嘅市盈率,亦可以攀升。當時我話過:「江銅一年可以每股賺兩元,而如果市盈率係8倍,即係話股價就會16元一股。」無獨有偶,由4月1日至今,銅價平均真係徘徊喺7600元1噸水平,而市場亦好似接受呢個唔係泡沫。江銅升穿我嘅目標價,唔係冇根據。

咁仲有冇得升

當然,如果睇江銅股價走勢圖,我咁多理論都好,由建議日到7月初曾經升上15.74元一股。到「大奇迹日」,全日最低見過10.4元,仲低過建議日開市價。江銅居然可以喺之後嘅6個交易日,由低過建議價到升穿目標價。我當然係繼續話係因市場卒之明白以上嘅理由,所以升。不過,大家就可能覺得係大陸同胞可以「炒股自由行」,炒AH股折讓,所以升。無謂拗,中就得。
最後,大家一定會問:「究竟江銅仲有冇得升?」我只可以話,用港元計,江銅A股噚日收42.87元一股,仲有冇得升?你話呢?
金手指網誌: http://phatdat.blogspot.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載