› 選擇地區
三藩市
紐約
洛杉磯
其他美國地區
香港 台灣 北美
 
2007年10月23日

港股急挫富豪身家大縮水
中環在線:超人最傷唔見咗67億 - 李華華

噚日恒指急跌過千點,40隻藍籌股中,只有港交所(388)獨善其身,收市唔單止冇跌反而微升0.08%;其餘無一倖免全部跌,當中又以國企、工商同地產股跌幅最大,滙豐(005)跌咗5蚊,至於幾隻大孖沙旗艦股全部插水,長實(001)、新地(016)同新世界發展(017)跌4至5%。

相關新聞:中環在線:真金白銀收股息

獨港交所唔使跌

股價跌,揸住公司股份嘅大孖沙,賬面身家自然蒸發咗唔少,華華最鍾意同人計身家,冇得使都有得「恨」吓嘛!嗱,有金叵羅孫女旺住嘅「香港股神」李四叔,今年真係順心順意,噚日旗艦恒地(012)只係跌咗1.35銀,至於佢亦揸唔少嘅煤氣(003)更加只係跌0.34蚊,係咁易計吓,應該都係跌咗十零億左右;對於佢嚟講,私人擁有嘅兆基財經都賺過千億啦,賬面唔見嗰十零億,連碎銀都講唔上,頂盡都係神沙!所以華華都無謂同佢計喇。

郭氏三兄弟唔見60億

呢位李生今年大旺,另一位李生就斯人獨憔悴,以四大地產商嚟講,超人李嘉誠嘅長實(001),噚日無論以幅度定係金額計,都係跌得最甘嗰隻,跌咗7.2銀,跌幅達5.43%。以超人揸住嘅長實計,賬面身家蒸發咗66.7億銀(見表)。不過咁,首富話過:「不義而富且貴,於我如浮雲。」幾十億……浮雲啫,咪由佢飄過囉!
至於另一隻跌得都幾甘嘅地產股,就要數到新鴻基地產(016)嘞,跌咗5個半,郭氏三兄弟賬面身家唔見咗近60億銀,正所謂兄弟同心,其利斷金,一齊跌鑊甘。
至於股神李四叔老友,彤叔鄭裕彤就冇咁傷,新世界發展噚日收市跌咗1.3銀,彤叔賬面身家只係唔見咗約17億,又係碎銀啦!
電郵:mailto:LiWaWa@AppleDaily.com

相關新聞:中環在線:亞洲女首富身家保不失

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載