› 選擇地區
三藩市
紐約
洛杉磯
其他美國地區
香港 台灣 北美
 
2007年10月23日

中環在線:阿里巴巴上市馬雲最得閒 - 李華華

馬雲話呢個禮拜,係佢多年嚟最輕鬆嘅時候。 美聯社

阿里巴巴(1688)今日正式公開發售,市場反應有幾熱烈,睇睇噚日記者會有過百名記者出席就估到,除咗本地傳媒,仲有唔少嚟自大陸甚至日本嘅媒體。
記者會舉行時間係黃昏6點,主要係就番身在紐約嘅公司管理層,因為美國時間係早上6點,主席馬雲喺視像會議上都話,佢好似仲瞓緊覺。通常公司上市前做路演都會好辛苦,因為要不停見機構投資者,解釋間公司,等佢哋畀面支持吓,阿里巴巴10月15號開始路演,馬雲話實情唔係咁辛苦,反而覺得呢個星期係咁多年嚟最輕鬆,因為大家準備工夫做得好,佢每日淨係負責講十分鐘嘢,仲有好多時間可以思考其他問題,甚至騰出時間打吓波、睇吓戲同參觀展覽館㖭。
雖然話認購反應好,但首席執行官衛哲喺記者會上都要為公司賣吓廣告,佢話阿里巴巴嘅使命係「讓天下沒有難做的生意」,仲數晒公司六大價值觀:「激情、誠信、敬業、團隊合作、擁抱變化、同客戶第一」。誇張?未算,你都未聽埋佢硬銷公司嘅口號,「投資阿里巴巴,就係投資高增長、高利潤率、高現金流嘅公司,就係投資中國經濟最活躍嘅中小企市場,最有前景嘅互聯網市場。」服未!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載