› 選擇地區
三藩市
紐約
洛杉磯
其他美國地區
香港 台灣 北美
 
2007年10月23日

金手指:越搞托市 越未見底 - 孫柏文

今日,首先要出個更正啓事。大家都知道,花旗國財長HankPaulson呢排忙緊搞個叫MLEC嘅「接收冇交易、冇市價債券」超級基金。基金現在喺集資階段,籌集用嚟買貨嘅錢。花旗、美銀、JPMorgan應承會參與。
上周末,意大利央行行長MarioDraghi話,Fidelity同債王BillGross管理嘅債券基金PIMCO都會搞埋一份。所以噚日孫柏文話BillGross有份。不過噚晚,PIMCO發聲明話「不會參與」。

等發掘自己市價

如果要我分析,意國央行行長應該唔係存心老點。只不過事態發展立立亂,所以先至流言滿天飛。呢個MLEC十畫都冇一撇,嗰一撇仲要係用鉛筆寫,分分鐘擦埋。
講真,呢個MLEC我上個禮拜已經鬧過,BillGross亦話係lame(廢)。噚日,批評「用MLEC救市」建議又多一個人。佢就係前聯儲局局長格林斯潘。佢話,呢個MLEC接收啲冇交易、冇市價嘅債券,只會拖慢pricediscovery。
Pricediscovery係乜?就係一樣資產發掘自己嘅市價。例如,啲銀行手上有好多票面值100元嘅債券。因為冇人出價買,所以就冇交易、冇市價。格林斯潘想見到啲銀行掛牌放盤,100元冇人買,就試90、80、70餘此類推。如果要去到1元先有人肯買,就算數。起碼啲債券搵到市價。
100元跌到1元咪好大鑊?係。資不抵債嘅投資機構就會執笠,銀行需要大規模撇賬,股價一定大跌特跌。不過,市場就可以見底復活,因為有番透明度,所以財長越搞托市,債市越未見底。相信格林斯潘同Paulson講:「Hank,thisplanissohardplastic。」

煙草商人鬧醫生

不過,格林斯潘批評呢個建議,真係非常諷刺。財長搞MLEC,都係想醫番好因為信貸泡沫爆破,衍生出嚟嘅「債市停頓」問題。大家要問問自己,呢幾年信貸泡沫點嚟?咪就係格林斯潘嘅聯儲局,當年瘋狂減息,濫發鈔票而成。
格林斯潘話MLEC阻住債市復活,話債市停頓問題唔係咁醫。就好似一個前煙草商人,走去鬧一個醫生,話:「肺癌唔係咁醫㗎!」成單嘢真係硬膠。
金手指網誌: http://phatdat.blogspot.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載