› 選擇地區
三藩市
紐約
洛杉磯
其他美國地區
香港 台灣 北美
 
2007年11月27日

中石油博A見底H反彈

噚日油股發威,九龍塘楊小姐亦推介中石油(857),佢建議現價可入貨長揸。中石油H股一個月前曾經升到去近20蚊嘅歷史高位,連股神畢菲特沽貨都一於照升,都係博一個「回歸」神話,點知A股上咗市之後,股價係咁跌,H股都無好過。但係楊小姐一於無有怕,「中石油A股係咁跌,H股呢幾日反而好硬淨,14蚊個位都跌唔落。如果(中石油)A股唔再跌,咁我好相信H股嘅反彈力度就會更強。」

H股硬淨 14蚊跌唔落

事實上,中石油H股近期都開始唔係點跟A股走,中石油A股噚日跌咗成2.4%,收33.76元人民幣,再創上市新低;但H股尾市就越戰越勇,收15.14蚊,升咗6%。
楊小姐話中石油嘅油田遍佈世界各地,內地掀油荒,國際油價又急升,前景當然看好。佢仲係正股14蚊左右入咗隻好短期嘅call輪(9089),呢隻輪下個月就到期,佢博中石油半個月內大反彈,咁隻輪嘅爆炸力就真係無法估計咁厲害咯。
不過,翁世權就提醒楊小姐,「如果中石油跌番去12蚊,呢隻輪就真係會跌得好急㗎!甚至可以瞬間消失。」點知楊小姐原來好勇,佢話:「玩輪都預咗allornothing(孤注一擲)!」

輪商有陰影 引伸波幅挫

翁世權都話,呢排啲輪「縮晒水」,引伸波幅跌得好犀利,「都係怪前排升得太癲,搞到輪商沽貨都沽到驚。」佢建議,「如果揀番啲有防守能力嘅輪,揀出年五、六月到期嘅會好啲。」
孫柏文都對中石油看高一線,「內地油荒持續,加價壓力大;國際油價上半年大升,中石油都應該執唔少;如果等到中石油出年三、四月出業績呢,我睇好佢可以升穿20蚊㖭!」

泓鋒國際(2309)
消息股當窩輪炒

今年港股大升,激發散戶冒險精神,荃灣網友陳先生就買咗一隻消息股泓鋒國際(2309),佢話:「喺11月頭,0.83蚊價位買入,諗住佢有收購概念,買咗英國伯明翰球隊,對股價有刺激作用,博佢由高位跌落嚟有反彈。」點知泓鋒嘅股價一沉不起,昨日收市0.51蚊,比7月中1.84蚊高位,跌超過七成。

要止跌 還看伯明翰

既然買泓鋒係因為佢買伯明翰,孫柏文問:「陳生,你有冇睇波嘅習慣?」陳先生回應:「間中啦,好似伯明翰近輪嘅表現唔係咁好。」孫柏文話:「買呢類股票最緊要睇球隊嘅表現,同埋門票收入;如果球隊踢得差,就要諗吓走咗佢喇。」
孫柏文講嘅係基本因素,不過,陳先生就話當泓鋒係窩輪咁炒,因為泓鋒今年嘅股價,十足窩輪咁,由毫子股炒到過1蚊,再跌番落幾毫子。
翁世權就提醒陳生:「買泓鋒唔可以當窩輪咁炒,窩輪有莊家,𠵱家嘅投資策略,最緊要睇股票嘅流通量,如果掛牌買貨量減少,投資者就要小心。」家陣泓鋒仲未完成收購伯明翰球隊嘅交易,上個禮拜主席楊家誠開記招,先話獲准延遲收購限期至下個月31號喎,泓鋒股價幾時先見底?等完成收購先再講啦。

中交建(1800)
短炒揀新輪避蟹貨

散戶同國際投資者都虎視眈眈嘅中國中鐵(390),𠵱家做緊公開招股,睇嚟中籤率都唔慌高得去邊。將軍澳Michael就建議大家,諗吓隻有影子概念嘅中國交通建設(1800)。佢話中交建最高曾經去過25.4蚊,雖然噚日已經升咗成4.7%,但佢認為仍然有機會再上。Michael預計,如果周一美市造好,就會追入,炒短線睇一個月。

中鐵影子股

翁世權就話,除咗要留意中鐵上市後,投資者會唔會由中交建換馬去中鐵之外,如果係買輪就更加要小心,因為中交建係20蚊頭,係行使認購證蟹貨聚集最多嘅地方,特別係喺18蚊炒上嚟嘅時候。佢建議Michael,如果想短炒,應該揀啲新輪,避開一啲兩三個月前累積落黎嘅中交建蟹貨輪。

有利集團(406)
股價未反映堅料

長沙灣區小姐問有利集團(406)情況如何,區小姐話:「佢停牌停咗幾日啦!」原來區小姐喺1.88蚊買入,𠵱家收到消息,有利賣咗旗下銅鑼灣快捷假日酒店,想問吓主持及嘉賓呢隻股嘅前景。
孫柏文解釋:「投資界有句說話,Buyontherumors,sellonthenews,佢停得牌即係news係堅。」不過既然news成真,孫柏文覺得可能有沽壓,區小姐滿懷希望:「股價應該未完全反映好消息。」
翁世權表示:「隻股停咗牌,現時無咩可以分析。除了消息,仲要靠自己對公司行業及物業是否熟悉。」孫柏文補充,要留意公司如何利用套現得來的資金:「有好多大股東唔係點錫啲小股東。」

恒指法興call輪(4994)
大市反彈仲有水位

網友阿聰睇好後市,推介恒指call輪(4994)。呢隻輪噚日收市報0.215蚊,升咗成24%,最高更見過0.217蚊。
阿聰睇好後市嘅主要原因,係認為恒指由32000點跌落嚟,累積差唔多有成6000點跌幅,𠵱家入市應該仲有水位,期望今個禮拜恒指發力,反彈去29000左右。
阿聰話,喺兩毫子買入4994,目標價睇兩毫半,入市時間係噚日朝早:「因為見裂口高開,通常會落番少少,畀人買吓貨先。」
翁世權讚阿聰「入得幾準」,更話:「如果持有兩個禮拜,咁隻輪嘅溢價,就應該影響唔大。」
阿聰滿有信心咁話:「我睇好下周美國減息,股市有得升,雖然今日大升,不過成交唔算多,唔排除係一次反彈。」無所謂啦,今個禮拜都可以炒住先呀!

今日嘉賓:亨達集團研究部董事黃敏碩

每日收市後4:30pm

想搵名家教路,請登入以下網址
http://appledaily.atnext.com/jp/finance 登記
成功參與節目者,有機會獲贈禮品

歡迎Phonein28698262

*以webcam參與節目者,可額外獲贈KFC$100現金券

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載